Хальмг Таңһчд нарт-делкән ик чинртә керг-үүлдвр эн җилин һаха сард болхмн. Хальмгин хотл Элст балһснд делкән кесг орн-нутгас Бурхн Багшин номд шүтдг улсин элчнр, шаҗна үүлдәчнр, номтнр, йосна халхин һардачнр ирҗ цуглрхмн. Цугәрәсән болн Хальмгин оюни җирһлд ик чинр зүүҗәдг керг-үүлдврт белдвр келһн эклсн бәәнә. Хургин көдлмшт орлцх һазадын орн-нутгудын тускар умшачнртан келҗ өгхәр бәәнәвидн.

Эн җил Элстд шар шаҗна нарт–делкән хург болхмн. Делкән ик чинртә йовдлд эртәснь белдвр кегдҗәнә. Әрәсән президент Владимир Путин эн хургин чинринь темдглҗәхин тускар Хальмг Таңһчин Толһач Хаска Батула харһсн кемд ончлҗ заасмн. Делкән бурхн-шаҗна үүлдәчнр Элстд цуглрҗ ирх йовдлд цуг халхин белдвр кехин тускар Таңһчин Толһач Хаска Бату урднь келсмн.

Зулын байрин өмн насан утдулдг авъяс хальмгудт бәәнә. Бурхн Багшин Алтн сүмд җил болһн нас утдуллһна мөргүлмүд болна. Эн җил Зулын байр Хальмгт бар сарин 25-д темдглгдхмн. Тогтсн авъясар нас утдуллһна мөргүлмүд амрлһна өдрмүдт болхмн.

Хулһн сарин 22-т Бурхн Багшин номд шүтдг делкән цуг әмтн хамгин ик байран темдглнә. Бурхн Багш 33 бурхна евәлтә һазрас бууҗ ирсн өдр болҗ тернь күндлгднә.

Москвад бәәдг, тенд сурһуль сурчадг, көдлҗәдг әмтнд шаҗна номд орх таал учрҗана. Тенд үүлддг Хальмг элчллтд Санан гелң болн Цунду гецл үкр сарин 17-д асхн 17 часас авн әмтнлә харһҗ, теднд ном умшхмн. Эндр болхла 12 часас авн 17 час күртл номд орҗ болхмн. Кергәрн ирсн әмтн неҗәдәр, эс гиҗ багарн орҗ, гелңгүдлә харһҗ чадҗана. Цуг кергтә йосрхлыг эдн күцәхмн.

Запорожск мүҗин Куликовское селәнд бурхн-шаҗнд шүтдг улс ирҗ, мөргүл кеҗәх хора секгдсмн. Әрәсән Федерацин Зертә-зевтә чидлмүдин 36-ч цергин полигона бәәрнд тер хора экләд үүлдсмн.

Лаганя района Северное селәнд суврһн босхгдв. Суврһиг әрүсллһнә болн үүлдврт оруллһна йосрхлыг Дрепунг Гоманг хурлын гелңгүд күцәснь ончта йовдл болҗана.

Хулһн сарин 26 -д Элстд Ноһан Дәркд нерәдҗ мандл тосхгдхмн.

Бурхн Багшин номд оньган өгчәх улсин то җил ирвәс икдәд йовна. Ах үйин улсиг дахад, баһ үй өсч йовна. Өвкнрин шаҗна тускар теднд келҗ өгх төр номтнрин, шаҗна үүлдәчнрин, багшнрин, эк-эцкнрин өмн тәвгдсн бәәнә.

Бурхн багшин сурһаль хол Төвдин һазрас Иҗл һолын көвә күртл тархагдҗ, мана өвкнрнлә хамдан күнд болн ут хаалһ кеҗ маднд күрв. Мана аавнр-ээҗнр шар шаҗнд иткәд, олн бурхдтан зальврҗ җирһлин хаалһднь харһсн күчр-күнд тоотыг дааҗ һарсмн. Күнд цагла хальмг ламнр номарн урмдулҗ, дәәнә болн тууврин цагт мана ах үйин улст ицл өгдг бәәсмн.