Әрәсән олн үртә өрк-бүлмүд

29-11-2023, 16:52 | Общество

«Әрәсә» гидг нарт делкән һәәхүлд орн-нутгин олн үртә өрк-бүлмүдт нерәдҗ РФ-н күч-көлснә министерств «Өрк-бүл. Көдлмш. Ут насн» гидг зәңгллһнә самб секв. Терүнд өнр-өсклң өрк-бүлмүдин тускар келгдҗәнә.

- «Өрк-бүл. Көдлмш. Ут насн» энтн мана һоллгч үнтә зөөр болҗана. Әрәсән Президент Владимир Путин терүг дәкн-дәкн темдглҗ, күн болһнд өрк-бүлнь хамгин үнтә болна, мана аав-ээҗнр ут нас наслҗ удан цагт маднд түшг болҗ йовтха гиҗ келнә. Тааста көдлмш бәәхлә күн болһн олзта-орутаһар үүлдҗ өрк-бүлән теҗәҗ чадна, тегәд терүнә төлә сән таал тогтах кергтә. Мана «Өрк-бүл» гидг һәәхүлд «Җилин сән гисн өрк-бүл» гидг Цугәрәсән марһанд сүл зурһан җилин эргцд диилвр бәрсн 17 өрк-бүлин зургуд олна оньгт тусхагдҗана, - гиҗ Әрәсән күч-көлснә болн социальн харслтын министрин дарук Андрей Пудов темдглв.
Һәәхүлд үзүлгдҗәх олн үртә өрк-бүлмүд дунд олна бәәдл-җирһлд орлцдг, спортар соньмсдг, хамдан зуулчлдг, ансамбль тогтаҗ билг-эрдмәрн нер һарч йовдг улс болна. Терүнд орлцҗах өнр-өсклң өрк-бүлмүд дунд Хальмг Таңһчин элчнр бас бәәхнь байрта. 2020 җилд Цугәрәсән марһанд «Олн үртә өрк-бүл» гидг номинацд диилвр бәрсн Улановихнә өрк-бүлин зург зөвтә орман эзлв. Тавн үртә Улановихнә өрк-бүлд эднә зург һәәхүлд шүүҗ авгдснь байр үүдәв. Очр болн Наталья күүкдтән үлгүр болхар зүткнә. Келхд, Наталья Хальмг Таңһчин Олна палатын гешүн болна, арһлач болҗ буйнч седклин керг-үүлдврт демән күргҗ, баһ тетквртә болн җирһлин таалд туссн, олн үртә өрк-бүлмүдиг дөңннә.

БАТАН Сәәхлә
ЗУРГТ: «Әрәсә» гидг нарт делкән һәәхүлд Улановихнә өрк-бүлин зургуд олна оньгт тусхагдв

Видео