Тавн көвүнь өлзәтә үрд болна

04-12-2020, 11:38 | Общество

Өнр-өсклң Цыкаловихнә өрк-бүлд тавн көвүн өсчәнә. Ууһн Станислав көвүнь Краснодар балһснд «Орс телефонн компань» гидг акционерн ниицәнд көдлн бәәҗ Хальмг Ик сурһульд заочн кевәр сурчана. Эн иргчдән юристин эрдмтә болхмн. Әәрмд церглҗ йовсн цагтан эн цергә эрдм сәәнәр дасч авад, сән белдвр үзүлсн төләдән цергә әңгин командирин ханлтын бичгәр ачлгдсмн. Денис Элст балһсна 2-ч тойгта сурһулин 11-ч классин сурһульч болна, ирх җилд эн шүүврән өгәд, тааста эрдм шүүҗ авч цааранднь сурхмн. Көвүн спортивн болн билг-эрдмин кесг марһаст шунмһаһар орлцҗ, оньдин олна нүүрт йовна. Эн «Хоровод дружбы» гидг фестивальд, «Диилврин волонтермуд» гидг квест-нааднд орлцсмн. 9-ч класст сурчах Ярослав 1-ч тойгта көгҗмин сурһульд сурад, аккордеон татдг дассмн. Эн бас билгтә көвүн болҗ өсчәнә. Ярослав шүлгләнд йир дурта болна. Темдглхәс, көвүн хальмг кел сәәнәр меднә, «Җаңһрин ачнр», «Живая классика» гидг марһаст диилвр бәрсмн, олимпиадт, конференцст, КВН-д болн нань чигн керг-үүлдврт эн орлцҗ нер һарсмн. Родион ахнрас үлгүр авч бас сурһулян сәәнәр сурна, олна бәәдл-җирһлд шунмһаһар орлцна. Эн орс келнә, эсвин, эргндк йиртмҗин олимпиадт, «Цифровые умняшки» марһанд гүн медрл үзүлнә. Ода эн 4-ч класст сурна. Отхн Даниил балһсна 3-ч тойгта бичкдүдин садт орна. Эн бас ахнрас ард үлдлго билгтә, спортар соньмсдг, шулун-шудрмг көвүн болна.
Герин эзн Александр Николаевич арһлач болҗ көлгн-күчнә халхар үүлднә. Сул цагтан Денис болн Ярослав көвүднь эцкән дахад, бичкнәсн авн ямр нег зи сольдг, көлгн-күчиг әрүнәр олзлдгиг дасна. Марина Алексеевна көвүдтән чик сурһмҗ өгдг деерән талдан чигн күүкд-көвүдт килмҗән тусхаҗ үүлднә. Эн бичкдүдин садт немр сурһулин багшар көдлнә. Күүкд күн герин керг дала болн көдлмшнь дааврта болдг бийнь көвүдиннь җирһләр даңгин соньмсна. Денис сурчах классин эк-эцкнрин комитетин ахлач болна, тегәд хаһлх кесг төр учрна. Келхд, Александр Николаевич болн Марина Алексеевна бийснь Элст балһсна 2-ч тойгта дундын сурһульд сурч йовсмн. Тегәд төрскн сурһулиннь җирһлд эдн орлцдгнь хара биш.
- Көвүдтән чик сурһмҗ өгч, эдн өлзәтә сән үрд болҗ өсхин төлә эк-эцк болһн тедндән үлгүр болх зөвтә. Өөрән бәәдг улст килмҗән тусхаҗ, цаһан седклтә болх, төрҗ һарсн балһсндан, таңһчдан болн орн-нутгтан эңкр болхиг сурһмҗлх кергтә, гиҗ олн үртә эк Марина Алексеевна келнә.
ДАВАН Наталья

Видео