Бурхн-шаҗна һәәхүлд орлцв

24-10-2026, 11:46 | Общество, Таңһчин зәңгс, Хальмг Тањєчин Толєачин ґдр-бўр, Зіњг

Хальмг Таңһчин Толһач Хаска Бату бурхн-шаҗна үүлдәчнрин төв заллтын ахлач, гевш Йонтенлә хамдан «Алмазная колесница. Буддийское искусство России» гидг һәәхүлд орлцв. Әрәсән бурхн-шаҗна билг-эрдмин туск төсв түрүн болҗ күцәгдв. Терүнд Хальмгин, Бурятин, Тыван болн орн-нутгин нүүрлгч музеймүдин әрүн чинртә 700 һар тоот олна оньгт тусхагдв. Пушкинск музейд секгдсн һәәхүлиг олн-әмтн хәләхәр ирв.
- Мана таңһчин төлә эн йовдл ончта болснь лавта. Хальмг Таңһч Европд бурхн-шаҗна төв болҗ тоолгдна. Н.Пальмовин нертә Келн-улсин музей эн һәәхүлд орлцҗадгнь бахмҗта, эдн эврәннь саңгас өвәрц 30 тоот авч ирв. Бидн бурхн-шаҗна шүтә, бумблвс, хурлмудын болн ламнрин зургуд авч ирвидн. Олн улс мана соньн сойлын, бурхн-шаҗна билг-эрдмин өвәрцинь үзҗ чадхмн. Иим керг-үүлдврмүдин нилчәр бурхн-шаҗна регионмуд, тер тоод мана таңһч олыг соньмсулна. Энтн маднд бахмҗ үүдәсн деерән шинҗләчнрин, зуульчнрин, мана орн-нутгин сойлар, тууҗар соньмсдг улсин оньг авлхнь лавта, - гиҗ Хаска Бату темдглв.
Таңһчин Толһач А.С.Пушкинә нертә музейин һардач Екатерина Проничевад, һәәхүл бүрдәһәчнрт болн эн төсв күцәлһнд орлцсн цуг улст ханлтан өргәд, үкр сарин 1 күртл болх һәәхүлд ирҗ орлцтн, гиҗ цугтаднь дуудвр кев.
БАТАН Наталья

Видео