Октябрьск района «50 лет Октября» эдл-ахуд олн җилин эргцд тутрһ урһаҗ, баһ биш олз-ору авна. Эн өдрмүдт энд тутрһ хуралһна дааврта кем төгсв. Тәрәчнр көдлмшән ик даавртаһар күцәһәд, сән урһц хураҗ авхин төлә арһ-чидлән агсч көдлв. Ода хураҗ авсн тутрһиг цеврләд, эд-бод кеһәд, орутаһар хулдхин төлә арһлачнрла бооца белдҗәнә. Келхд, бәәрн арһлачнрас нань хам-хоша бәәдг Сарпулин крайин болн Ростовин мүҗин бүрдәцс мана тутрһиг сәәнәр хулдҗ авна.
- Эн җил бидн 1552,5 гектар аһу һазрт тутрһ тәрсн биләвидн. Хөн болн мөчн сармудт хур-чиг орад, зөвәр киитн болв, намрин эклцәр болхла салькн көдләд, теңгрин бәәдл харшлтан күргв. Тер бийнь бидн эн җил нег гектарас 47 центнер тутрһ хураҗ аввидн. Эн җилин урһц ниднәк кемҗәнлә әдлхн болв, авсн зураһан күцәввидн гиҗ келҗ болҗана. Бидн эврәннь тәрәнә эк олзсн деерән зәрминь хулдҗ авнавидн. Тутрһ урһахин төлә усн кергтә, тегәд Әрәсән селәнә эдл-ахун Министерств йилһсн мөңгәр эн төр хаһлгдна. Зуг усн үнтә болҗахнь нәрн төр болҗана. Дәкәд сүл җилмүдт бидн техникән шинрүләд угавидн. Мана эдл-ахуд кергән сәәнәр меддг, байн дамшлтта улс көдлнә, цуһар тутрһ тәрлһнә, урһц хуралһна кемд ик даавртаһар көдлснд күн болһнд ик ханлтан өргҗәнәв, - гиҗ эдл-ахун һардач Санҗин Николай келнә.

«Сойл сурһульчнрин төлә» гидг сойлын-сурһулин төсвин йовудт хулһн сарин 15-ас авн үкр сарин 5 күртл «Киитн Аавиг йөрәтн!» гидг Цугәрәсән керг-үүлдвр болҗана. Әрәсән Президентин болн орн-нутгин залврин медлд үүлддг Вологодск мүҗин элчллт болн «Киитн Аав» бүрдәц эн керг-үүлдвриг Әрәсән сойлын министерствин дөңгәр бүрдәв.

2026 җилин «Келн-улсин бахмҗ» гидг Цугәрәсән олна мөрәһәр ачлгдсн «Иньгллт» келн-улсин Гер» гидг АНО-н ахлач Шевкин Ревмира болн «Барт» олна ниицәнә ахлач Умар Эльжуркаев басң өдрлә «Калмыкия» зәңгллһнә бүрдәцд седкүлчнрлә харһв.

Давсн долан хонгин чилгчәр Элстд Хальмг Таңһчин күүкд улсин ниицәнә байрин хург болв. Әрәсән улсин ниицлтин җилд болн фашистнрин өмнәс хөрлһнә советин күүкд улсин әңгин 85 җилин өөнд эн керг-үүлдвр нерәдгдв. Хальмг Таңһчин залврин Ахлач Босхмҗин Гилән, Хальмг Таңһчин Улсин Хуралын (Парламентин) депутат Налыка Светлана, таңһчд үүлддг олна бүрдәцсин болн келн-улсин ниицәсин элчнр байрин хургт орлцад, таңһчин олна бәәдл-җирһлд шунмһаһар орлцҗадг, дорас өсч йовдг бичкдүдт төрскнч сурһмҗ өглһнд, өрк-бүлин чинр батруллһнд ач-тусан күргдг күүкд улсиг йөрәв.

Шидр «Калмыкия» гидг зәңгллһнә бүрдәцд болсн харһлтд эрүл-мендин бәәдлән шинҗллһнә керг-үүлдврмүдин төр босхгдв. «Сулда» Төвин һардач Кусьминә Светлана, балһсна поликлиникин ах эмчин үүл дааҗадг Китан Ольга, гүлгн гемәс хөрлһнә таңһчин эмнлһнә ах эмч Мутла Земфира болн нилхд төрлһнә төвин ах эмч Бадмин Җирһл харһлтд орлцад, олн зүсн гемәс саглуллһна керг-үүлдврт орлцҗ, цаглань ямр нег гем илдкҗ эмнлһ экллһнә тускар тодрхаһар келҗ өгв.

Хальмг филармоньд «Алтн булг» гидг көгҗмин шин хураңһун тускар күүндвр болв. Хальмг Таңһчин ачта артист Очкан Борисин дуулҗ йовсн болн бийнь бичсн дуд эн соньн дегтрт орв.
Борис Дорджиевичин элгн-садн, өөрхн улс, көгҗмчнр, артистнр, бичәчнр, дуучнр, олна үүлдәчнр, седкүлчнр эн керг-үүлдврт орлцв. Дегтрин тускар, терүг белдлһнд орлцсн олн күүнә тускар нертә дуучин күүкн Хальмг улсин артистк Очкан Анна цуглрсн улст келҗ өгв. Эцкнь әмд-менд бәәхдән дуулҗ йовсн дуд «Арвн дун» гидг хураңһуд орсинь тодлад, тиигхд эцкднь дөң болсн улсин неринь зааҗ, ханлтан өргв.

Хальмг филармоньд «Алтн булг» гидг көгҗмин шин хураңһун тускар күүндвр болв. Хальмг Таңһчин ачта артист Очкан Борисин дуулҗ йовсн болн бийнь бичсн дуд эн соньн дегтрт орв.
Борис Дорджиевичин элгн-садн, өөрхн улс, көгҗмчнр, артистнр, бичәчнр, дуучнр, олна үүлдәчнр, седкүлчнр эн керг-үүлдврт орлцв. Дегтрин тускар, терүг белдлһнд орлцсн олн күүнә тускар нертә дуучин күүкн Хальмг улсин артистк Очкан Анна цуглрсн улст келҗ өгв. Эцкнь әмд-менд бәәхдән дуулҗ йовсн дуд «Арвн дун» гидг хураңһуд орсинь тодлад, тиигхд эцкднь дөң болсн улсин неринь зааҗ, ханлтан өргв.

«Ик гастрольмуд» гидг орн-нутгин төсвд орлцад, Хальмгин «Җаңһр» нертә наадһасин театр түрүн болҗ Бурятьд гастрольд одад, нааддан үзүлв. Тавн җилдән үүлдҗәдг театрт эннь ик чинртә йовдл болв. Дәкәд болхла нарт-делкән хәләврмүдт чигн, тер мет Москван тәәз деер театр нааддан үзүлв. Тегәд намрин сармуд театрин үүлдврин төлә ик урмдта болҗана.

Шидр Москва балһснд Әрәсән тосхлтын болн жилищн-коммунальн эдл-ахун министерств «Төрскн – энтн цергллһн мөн. Сән чинртә гер-бүүр болн көлгн-күчнә таал» гидг керг-үүлдвр давулв. Терүнд һазрин делгрлтин төсвсин Цугәрәсән марһана дииләчнриг ачлв. Марһана бүрдәмҗин багиг толһалдг Әрәсән тосхлтын болн ЖКХ-н министрин негдгч дарук Александр Ломакин дииләчнрт ачлвринь бәрүлҗ өгв.

Эн өдрмүдт Төрскән харсгч Алдр дәәнд орлцач Петр Леонтьевич Леонтьев таңһчин эмнлһнд эрүл-мендән батрулҗана. Хальмг Таңһчин Толһач Хаска Бату ветеранд золһҗ одв.