Хальмг Таңһчин Толһач Хаска Бату «Ар үзг» багин цергчнр болн Ленинградск цергә дуһргин һардач, генерал-полковник Евгений Никифоров Харьковск мүҗин ар-дорд үзгт ВСУ-н хортыг бүслврт авсна керг-үүлдвр күцәсиг онц темдглв.

Хулһн сарин 16-д Лагань балһснд Хальмг Таңһчар үүлддг Әрәсән МЧС-ин УГПС-ин түүмр унтралһна 2-ч тойгта әңгд чинртә йовдл болв. Минь энд цергә шишлң керг-үүлдврин йовудт баатр кевәр әмнәсн хаһцсн гвардин ах лейтенант Әрәсән Баатр Очр-Һәрән Нарна санлын самбр секлһнд нерәдгдсн олна митинг болв. Эннь мана таңһчин улсин төлә бәәтхә цуг орн-нутгт чигн темдгтә йовдл болснь лавта гиҗ сангдна.

Хальмг Таңһчин Улсин Хуралын (Парламентин) Ахлач Артем Михайлов Әрәсән Федерацин Хургин элчнр Хачира Борисла болн Путән Байирла харһв. Регионмудын зака үүдәгч Хургудла бат залһлда бәрҗ, дигтә-даратаһар көдлҗ, нөкцҗ үүлдхин тускар харһлтд келгдв. Таңһчин депутатнрин седвәриг дөңнәд, нег һазра улсин сә хәәҗ хамдан көдлхнь мана һол күсл мөн гиҗ сенатормуд темдглв.

Эн өдрмүдт мана таңһчд нертә номт болн олна үүлдәч Очра Номтын 140 җилин өөнд нерәдгдсн керг-үүлдврмүд болҗана. Ода деерән номтнрин номин-дамшлтын хургуд, сурһульчнрин төлә харһлтс давулгдв. Очра Номт сүл җилмүдт Приозерн района Советское селәнд (ода Көтчнрә района Көтчнр селән) дү күүкндән бәәсмн, тенд эн оршагдсмн. Хальмг улсин сойл, тууҗ, амн-үгин зөөр хадһллһнд туслсн, олн-әмтнд «Җаңһр» дуулвр медүлсн номтын нер мөңкрүлхин төлә нег һазра улс Көтчнр селәнд урһа моддын шишлң бәәр секх седвәр татв.

Хулһн сарин 11-д Сарпан района Аршан Зелмн селәнд өргмҗтә байрин керг-үүлдвр болв. Энд ясврин хөөн Бодь суврһс секгдв. Ик Бодь суврһн икхурла арвнд, хойр бичкнь ламнр Баля гелңд болн Бичкн Камбд нерәдгдҗ босхгдсмн.

Одахн Элстин политехникин колледжд байрин хург болв. СПО-н бүрдәцсин байрин Өдрт болн таңһчин олна үүлдәч Илья Ниманович Эльвартыновин 100 җилин өөнд эн нерәдгдв.
Колледжин һардач Васькинә Галина байрин хургиг нүр үгәр секв. «Давсн җил мана колледж 60 җилин өөнән темдглв. Эн җилмүдин эргцд мана сурһулин бүрдәц таңһчин эдл-ахун төлә 13 миңһн мергҗлтиг белдв. Тосхачнрин, маши залачнрин, уячнрин, өдгә эв-арһсин мергҗлтнрин эрдм дассн баһчуд эндр таңһчд көдлҗәнә. Дөрвн җил хооран мана колледжд Илья Эльвартыновин нерн зүүлһгдлә. Илья Ниманович кезә чигн колледжин бәәдл-җирһләр, оютнриг белдлһнә йовудар соньмсч, таңһчин ирлцңгү үүлдврин босхмҗд болн делгрлтд ик ач-тусан күргсмн»,- гиҗ Галина Васильевна темдглв.

Шидр зурһан үртә Боктаевихнә өрк-бүл «2026 җилин сән гисн өрк-бүл» гидг марһанд диилвр бәрсн өрк-бүлмүдлә хамдан Москвад Кремлевск бәәшңд болсн ик байрт орлцсн билә. Хальмг Таңһчин Толһач Хаска Бату Баатыр болн Екатерина Боктаевихниг диилвр бәрснләнь йөрәһәд, хөв-кишг дурдв.

Урҗ өдр Әрәсән юстицин министр Константин Чуйченко мана таңһчд керг-төрин халхар ирв. Хальмг Таңһчин Толһач Хаска Бату күндтә гиичлә хамдан засгла харһсн улсин төвд, Әрәсән УФСИН-ә 1-ч СИЗО-д, таңһчин Әрәсән юстицин министерствин заллтд одад, эднә үүлдврлә таньлдв. Сән авъяст тохрсар, Бурхн Багшин Алтн сүм болн Элстин чонҗ үзүлҗ, хальмг улсин сойлын, тууҗин, энд олн келн-улс ниитәһәр, кен-негнәннь авъяс күндлҗ бәәдгин тускар гиичд келҗ өгв. Тиигәд, нидн мана таңһчд шаҗна нарт-делкән ик хург болсна, эн җил болхла Христос Бурхн бууҗ ирснә әрүн йовдлын 80 җилин өөнин керг-үүлдврмүд өргмҗтәһәр давулгдсна тускар келснь гиичд өврмҗтә болв.

«Калмыкия» зәңгллһнә бүрдәцин седкүлчнр социальн халхар залһлда бәрдг Төвин көдләчнрин төлә дамшлтын кичәл давулад, зәңгллһнә эв-арһсин үүлдврин тускар келҗ өгв. Хальмгин Келн-улсин телеүзлин (НТК) зәңгллһнә әңгин һардач Тихона Чиңһс телеүзлин көдләчнрин көдлмшин, соңсхврмуд яһҗ белддгин тускар тодрхаһар цәәлһв. Харһлтд орлцачнр бийснь соңсхвр белдлһнә көдлмшт бас орлцҗ үзв.

Урҗ өдр Элст балһснд дулаһар тетклһнә кем эклв. Шидр хотл балһсна һардврин ЖКХ-н болн тосхлтын заллтын һардач Манҗин Эрднь олнд зәңгллһнә эв-арһсин көдләчнрлә харһад, дулаһар тетклһнә кемд балһсна бүрдәцс ямр кевәр белдснә тускар келҗ өгв.