Седвәртә күүкд улсиг ачлв

Сегодня, 15:24 | Общество, Таңһчин зәңгс, Зіњг

Давсн долан хонгин чилгчәр Элстд Хальмг Таңһчин күүкд улсин ниицәнә байрин хург болв. Әрәсән улсин ниицлтин җилд болн фашистнрин өмнәс хөрлһнә советин күүкд улсин әңгин 85 җилин өөнд эн керг-үүлдвр нерәдгдв. Хальмг Таңһчин залврин Ахлач Босхмҗин Гилән, Хальмг Таңһчин Улсин Хуралын (Парламентин) депутат Налыка Светлана, таңһчд үүлддг олна бүрдәцсин болн келн-улсин ниицәсин элчнр байрин хургт орлцад, таңһчин олна бәәдл-җирһлд шунмһаһар орлцҗадг, дорас өсч йовдг бичкдүдт төрскнч сурһмҗ өглһнд, өрк-бүлин чинр батруллһнд ач-тусан күргдг күүкд улсиг йөрәв.
- Мана таңһчд күүкд улс номин, сойлын, сурһуль-эрдмин, талдан олн халхст көдлнә, арһлачнр болҗ күцәмҗтәһәр үүлднә, олна бәәдл-җирһлд орлцна, күүкдән асрна. Эдн таңһчин күүкд улсин төлә үлгүр болна, эндр Хальмгин күүкд улсин ниицәнә зергләнд зурһан миңһн һар элч бәәнә. Әрәсән Президент Владимир Путинә зәрлгәр мана орн-нутгт улсин ниицлтин җил зарлгдсмн, мана таңһчд олн келн-улс кен-негнәннь авъяс, сойл күндлҗ ниитә бәәнә, келн-улсин элчнр бат өрк-бүлмүд тогтана. Олн шаҗна элчнр төрскн таңһчиннь делгрлтд ач-тусан күргҗ ээм-ээмән түшҗ ахнр-дүүнр мет бәәхнь бахмҗ үүдәнә, - гиҗ Босхмҗин Гилән йөрәлин үгдән темдглв.
Таңһчин күүкд улсин ниицәнә ахлач Эскләнә Данара олна бүрдәцин үүлдврин тускар ахрар келәд, Лаганя болн Сарпан райодт болсн байрин хургудыг тодлв. Тенд райодын күүкд улсин ниицәсин гешүд цуглрад, билг-эрдмән үзүләд, хоорндан таньлдад, нөкцҗ үүлдхин тускар үгцв. Одахн Москва болн Грозный балһсдт Әрәсән күүкд улсин ниицәнә ик хургт орлцсна тускар Данара Босхомджиевна бас келв. Цергә шишлң керг-үүлдврт орлцачнрин экнр болн авальмуд олна үүлдврт шунмһаһар орлцҗ, олна төлә зөрмгин болн төрскнч седклин үлгүр болдгиг онц темдгләд, эднд ханлт өргв.
Байрин хургин йовудт Баһ Дөрвдә, Үстин, Яшкулин райодын күүкд улсин әңгүдин ахлачнр Пашкан Татьяна, Үлмҗин Нүдлә болн Мистән Елена эврә көдлмшин тускар келәд, күцәсн төсвсин туск видеозурцс олна оньгт тусхав. Райодын селәдт бәәдг күүкд улс бичкдүдт төрскнч сурһмҗ өглһнә, цергә шишлң керг-үүлдврт орлцҗадг нег һазра улсиг дөңнлһнә буйнч седклин кергүд бүрдәлһнә, олн келн-улсин ниицлт батруллһна, күүкд улсин билг-эрдм делгрүллһнә керг-үүлдврмүд давулдгиг эдн медүлв. Седвәртә, шунлтта, төрскнч, өр-өвч седклтә күүкд улс олна нүүрт йовхиг эднә үүлдвр герчлҗәнә.
Таңһчин күүкд улсин ниицәнә гешүдин ач-тусинь темдгләд, олн ачлвр бәрүлҗ өггдснь хургин кеермҗ болв. Тиигәд, Лаганя болн Хар Һазра райодын күүкд улсин әңгүдин ахлачнр Коган Нарн Харцхан Байрта хойр Әрәсән Президентин Ханлтын бичгәр ачлгдв, Баһ Дөрвдә района әңгин ахлач Пашкан Татьянад «Җилин сән гисн күүкд күн» гидг нерн зүүлһгдв. Санҗин Наталья болн Хонхолджинә Галина «Әрәсән күүкд улсин ниицәнә күндтә сурһмҗлгч» гидг темдгәр, таңһчин күүкд улсин ниицәнә зәрм гешүд болн олна бүрдәцин үүлдврт дөң-тусан күргдг улс Әрәсән күүкд улсин Ниицәнә Күндллһнә һашгар ачлгдв. Тер мет «Өрк-бүлин альбом» гидг марһанд ончрсн олн үртә өрк-бүлмүдиг бас темдглв.
Таңһчин күүкд улсин ниицәнә әңгүд Төрскән харсгч Алдр дәәнд зөрмгән үзүләд, хортла дәәлдсн күүкд улсин туск һәәхүл белдв. Байрин хургин йовудт Хальмг Таңһчин күүкд улсин частр түрүн болҗ күңкнв. Элстин күүкд улсин әңгин ахлачин дарук Эскләнә Жанна цергә шишлң керг-үүлдврт орлцачнрт нерәдгдсн «Мини көвүн» гидг видео олна оньгт тусхав. Таңһчин билгтнр хургт орлцачнриг ду-бииһәрн байрлулҗ, седклинь байсав.
ДООҖАН Наталья

Видео