Тутрһ хурагдв

Сегодня, 16:00 | Общество, Таңһчин зәңгс, Зіњг

Октябрьск района «50 лет Октября» эдл-ахуд олн җилин эргцд тутрһ урһаҗ, баһ биш олз-ору авна. Эн өдрмүдт энд тутрһ хуралһна дааврта кем төгсв. Тәрәчнр көдлмшән ик даавртаһар күцәһәд, сән урһц хураҗ авхин төлә арһ-чидлән агсч көдлв. Ода хураҗ авсн тутрһиг цеврләд, эд-бод кеһәд, орутаһар хулдхин төлә арһлачнрла бооца белдҗәнә. Келхд, бәәрн арһлачнрас нань хам-хоша бәәдг Сарпулин крайин болн Ростовин мүҗин бүрдәцс мана тутрһиг сәәнәр хулдҗ авна.
- Эн җил бидн 1552,5 гектар аһу һазрт тутрһ тәрсн биләвидн. Хөн болн мөчн сармудт хур-чиг орад, зөвәр киитн болв, намрин эклцәр болхла салькн көдләд, теңгрин бәәдл харшлтан күргв. Тер бийнь бидн эн җил нег гектарас 47 центнер тутрһ хураҗ аввидн. Эн җилин урһц ниднәк кемҗәнлә әдлхн болв, авсн зураһан күцәввидн гиҗ келҗ болҗана. Бидн эврәннь тәрәнә эк олзсн деерән зәрминь хулдҗ авнавидн. Тутрһ урһахин төлә усн кергтә, тегәд Әрәсән селәнә эдл-ахун Министерств йилһсн мөңгәр эн төр хаһлгдна. Зуг усн үнтә болҗахнь нәрн төр болҗана. Дәкәд сүл җилмүдт бидн техникән шинрүләд угавидн. Мана эдл-ахуд кергән сәәнәр меддг, байн дамшлтта улс көдлнә, цуһар тутрһ тәрлһнә, урһц хуралһна кемд ик даавртаһар көдлснд күн болһнд ик ханлтан өргҗәнәв, - гиҗ эдл-ахун һардач Санҗин Николай келнә.
Эдл-ахуд ода 130 күн ниитә кевәр көдлнә. Замчнр сенр болн шимтә хот белдҗ, кеер көдлҗ йовсн механизатормудт өдрт хойр дәкҗ халун хот күргҗ өгнә. Җолачнр хураҗ авсн тутрһиг буудя хадһлдг бәәрнд зөөҗ күргв.
«50 лет Октября» эдл-ахуд тутрһас нань цаһан болн хар буудя урһана. Тиигәд, эн җил 926 гектар аһу һазрт цаһан буудя тәрсн билә, хар буудя болхла 812 гектар аһу һазр эзлв. Тутрһ хурасна хөөн цуглулҗ авсн салмиг бәәрн әмтнд, Сарпан, Баһ Дөрвдә болн Үстин райодт хулдна. Ода эдл-ахуд 800 толһа бод мал асргдҗана, терүг һару угаһар хадһлхин төлә малчнр урдаснь белдв. Хаврар авсн туһлмудыг сәәнәр бордад хулдв.
Эдл-ахун һардач Санҗин Николайин келсәр, тутрһ урһахд амр биш болна, усна, техникин төрмүд хаһлх кергтә. Сүл җилмүдт тутрһ кимдрҗәхәс иштә орун кемҗән чигн баһрҗана. Болв тер бийнь эдл-аху сән чинртә тутрһ урһаһад, сән урһц хураҗ авчана.

БАТАН Сәәхлә

Видео