Манахст – өөдән ачлвр

Сегодня, 15:31 | Общество, Таңһчин зәңгс, Зіњг

2026 җилин «Келн-улсин бахмҗ» гидг Цугәрәсән олна мөрәһәр ачлгдсн «Иньгллт» келн-улсин Гер» гидг АНО-н ахлач Шевкин Ревмира болн «Барт» олна ниицәнә ахлач Умар Эльжуркаев басң өдрлә «Калмыкия» зәңгллһнә бүрдәцд седкүлчнрлә харһв.
Ревмира Борисовна «Әрәсән келн-улсин төрскн келн» гидг әңгд диилвр бәрв. Эн баһчудын, эк-эцкнрин, багшнрин төлә хальмг кел даслһна халхар дегтрмүд, дөңцлмүд һарһна. Үлгүрнь, Мунин Бембә үүдәсн орс-хальмг толь олзлад, Ревмира Борисовна эврә толь үүдәв, терүнд сурһульчнрт керглгдх шин үгмүд орв. Тернь күүкдт болн эднә эк-эцкнрт таасгдад, одахн терүг шинәс барлҗ һарһв. Шевкин Ревмира хальмг кел дасхин төлә өдгә цага эв-арһс олзлад дөңцлмүд белдлһнд чигн орлцна.
- Тернь мана хамгин чинртә керг болна. Бидн төрскн кел даслһнд эндрк баһчудт дөңгән күргх зөвтәвидн. Мана эк-эцкнр, маднла хальмгар күүнддг бәәсн болхла, эндрк баһчудт тиим арһ уга. Төрскн келән меддг әмтнә то ода баһрад йовна, - гиҗ «Иньгллт» келн-улсин Герин ахлач келв.
Умар Эльжуркаев мана таңһчд чечен улсин сойлын бүрдәциг һардна. Олна үүлдәч «Әрәсән келн-улсин ниицлтд церглснә төлә» гидг әңгд «Келн-улсин бахмҗ» гидг мөрәһәр ачлгдв. Әрәсән келн-улсин бүрдәцин Хальмг Таңһчд үүлддг әңгин көдлмшт Умар Мокаевич шунлттаһар орлцна, мана таңһчд тогтурта бәәдл хадһллһнд ик оньг өггднә гиҗ эн тоолҗана. Ислам шаҗнд цуг келн-улс ниитәһәр бәәлһнә тускар келгднә, тер бәәдлиг бидн цааранднь чигн хадһлх зөвтәвидн. Шаҗна бүрдәцс хоорндан нөкцәд чинртә кергүдиг хамцу кевәр күцәхәр шунна, - гиҗ Умар Эльжуркаев темдглв.
Өөдән ачлвринь эднд Аһш балһснд бәрүлҗ өгсмн. Энд Өмн үзгин дуһргин регионмудын байрин керг-үүлдвр болв. Ирлцңгү мөрәһәр Әрәсән келн-улсин төрскн кел хадһллһнд, теднә сойлын делгрлтд болн келн-улсин хоорндк эвин бәәдл батруллһнд ач-тусан күргсн олна үүлдәчнриг, келн-улсин сойлын негдлтсин элчнриг ачлна. Ут турштан долан әңгд дииләчнр йилһгдв. Эднә төлә сойлын керг-үүлдврин көтлвр бүрдәгдәд, эдн этносойлын җисәнә делгрлтд нерәдсн «төгрг ширән» сүүрт бас орлцсинь заахмн.
ТҮРВӘН Һуна

Видео