Нег һазра улсин сән седвәр

Сегодня, 12:30 | Общество, Таңһчин зәңгс, Зіњг, Сойл

Эн өдрмүдт мана таңһчд нертә номт болн олна үүлдәч Очра Номтын 140 җилин өөнд нерәдгдсн керг-үүлдврмүд болҗана. Ода деерән номтнрин номин-дамшлтын хургуд, сурһульчнрин төлә харһлтс давулгдв. Очра Номт сүл җилмүдт Приозерн района Советское селәнд (ода Көтчнрә района Көтчнр селән) дү күүкндән бәәсмн, тенд эн оршагдсмн. Хальмг улсин сойл, тууҗ, амн-үгин зөөр хадһллһнд туслсн, олн-әмтнд «Җаңһр» дуулвр медүлсн номтын нер мөңкрүлхин төлә нег һазра улс Көтчнр селәнд урһа моддын шишлң бәәр секх седвәр татв.

Шидр Хальмг Таңһчин сойлын болн зуульчллһна министр Бембин Евгений, Көтчнрә района толһачин негдгч дарук Давинә Очр болн района медәтнрин хүүвин ахлач, Хальмг Таңһчин медәтнрин Хүүвин гешүн Шарапа Геннадий нертә номтд нерәдгдсн керг-үүлдврмүдин тускар келҗ өгв. Бембин Евгений харһлтыг секәд, номтын җирһлин болн номин-шинҗллтин үүлдврин тускар сергәҗ дәкн нег тодлулв. Дарунь Давинә Очр Элстд болх буйнч седклин концертин тускар зәңгләд, Көтчнрт Очра Номтын шишлң бәәрин тосхлтын көдлмш төгсәхин төлә дем керглгдҗәхин тускар бас келв. «Района медәтнрин хүүвин седвәрәр Көтчнр селәнд Очра Номтын уульнцд номтын нертә ирлцңгү бәәр секх шиидвр авгдсн билә. Ода деерән көдлмш төгсхдән өөрдҗ йовна, района әмтн эн кергт ут тоодан 1,5 сай арслң цуглулв. Хулһн сарин 21-д Элст балһснд Хальмг филармоньд 18 часла буйнч седклин концерт болхмн. Терүнд цуглулгдсн мөңгн эн көдлмш төгсәлһнд олзлгдхмн. Концертд таңһчин нертә артистнр, «Бумбин орн» бииһин ансамбль орлцхмн. Концертд ирәд, Очра Номтын нер мөңкрүллһнд демән күргтн», - гиҗ Давинә Очр нег һазра улст дуудвр кеҗәнә.
Шарапа Геннадийин келсәр, района медәтнрин болн ветеранмудын олна бүрдәцс эн деер келгдсн седвәр татад, дорас өсч йовдг үйнрт Очра Номтын нер тодлулх күсл зүүв. Така сард тосхлтын көдлмш экләд, цугнь дигтә-даратаһар кегдв, ода деерән әмтн йовдг хаалһ ясгдв, урһмл модд болн цецгүд суулһгдв, әмтн сууһад амрдг суудл бас тәвгдв. Очра Номтын бумб белн бәәнә, терүг эн өдрмүдт бас углҗ тәвхмн. Нег һазра улс демән күргҗ, эргндк һазриг ахулҗ, сән кец-таал тогталһнд орлцҗана. Эн бәәриг хулһн сарин 30-д байрин бәәдлд секхмн гиҗ зуралгдҗана. Геннадий Васильевичин келсәр, района әмтнә дөңгәр нидн хурл босхгдсн билә. Тиигәд, олна дөңгәр буйнч чинртә керг бүтҗәнә. Очра Номтын 140 җилин өөн угтҗ үкәртнь хаша-хаацнь болн бумбнь бас шинрүлгдснь темдгтә болҗана.
ДООҖАН Наталья

Видео