Әрәсән Баатрин нер мөңкрүләд

Сегодня, 12:47 | Общество, Таңһчин зәңгс, Зіњг, Эдн Төрскән харсла

Хулһн сарин 16-д Лагань балһснд Хальмг Таңһчар үүлддг Әрәсән МЧС-ин УГПС-ин түүмр унтралһна 2-ч тойгта әңгд чинртә йовдл болв. Минь энд цергә шишлң керг-үүлдврин йовудт баатр кевәр әмнәсн хаһцсн гвардин ах лейтенант Әрәсән Баатр Очр-Һәрән Нарна санлын самбр секлһнд нерәдгдсн олна митинг болв. Эннь мана таңһчин улсин төлә бәәтхә цуг орн-нутгт чигн темдгтә йовдл болснь лавта гиҗ сангдна.
Хальмг Таңһчар үүлддг Әрәсән МЧС-ин Ахлгч заллтын һардач, дотр-дундын цергллтин генерал-майор Мальтинә Мергн, Орн-нутгин Хүүвин депутат Михаил Богатов, Лаганя района толһач Коган Юрий, Әрәсән Баатрин аваль Елена Борисовна, көвүнь Юрий Наранович, зөв-йосна, олна бүрдәцсин элчнр, цергә үүлдврин ветеранмуд болн бәәрн әмтн эн санлын керг-үүлдврт орлцсинь темдглхмн. «Движение первых» җисәнә гешүд, юнармейцнр бас эн чинртә кергт ирҗ орлцснь нег үлү эднә төлә төрскнч сурһмҗта болв гих кергтә. Хол 1998 җилд төрскн балһсндан түүмр унтралһна эн әңгд Очр-Һәрән Нарн күч-көлсч хаалһан эклсн бәәҗ.
2022 җилин намрар болхла эн эврә сән дурар цергә шишлң керг-үүлдврт орлцхар шиидв. Энд эгл салдс болҗ цергә үүлдврән экләд, удл уга ротын командир болад залу-зөрмгәр дәәлдсн мөн. Энүнә һардврт мана цергүд Северск балһснд хорһдҗасн хортыг хамх цокад, ик һару угаһар даалһвран күцәсн билә. Эднә ротын дәәчнр эн балһснд әмтн бәәдг найн шаху гер сулдхад болн деермчнрин дөчн һар бәәринь уга кев. Әрәсән Федерацин Президент Владимир Путинә Зәрлгәр 2025 җилин бар сарин 15-д гвардин ах лейтенант Очр-Һәрән Нарнд Әрәсән Баатрин өөдән нерн зүүлһгдәд, «Алтн Одн»медаль бәрүлҗ өггдснь мана таңһчин цуг улсин төлә ик байр-бахмҗ болсмн.
Хальмг улсин хәәртә үрн Наран Алексеевич төрскнч седклтә күн болад чигн әмән әрвллго эврә орн-нутган хортнас харсад, баатр йовдл үзүләд нер һарснь кезәд чигн мартгдшго юмн гиҗ сангдна. Зуг харм төрхд, эн җилин мөчн сарин эклцәр нег һазра мана дәәч, хальмг Баатр цергә даалһвран цааранднь чигн залу-зөрмг кевәр күцәҗ йовад, Төрскнәннь төлә әмән өгснә туск һашута зәңг олыг икәр үүмүлсн билә.
-Хальмг дәәч-зөргтә командир Әрәсән Баатр Очр-Һәрән Нарн түүмр унтралһна эн әңгд эклҗ көдлснь цуг мадна, нег үлү үүрмүдиннь төлә ик бахмҗта йовдл болҗана. Северск балһсиг хортнас сулдхҗ йовад, хооран цухрдго йоста хальмг залун заң-авцинь иткүлҗ, зөрмгәр дәәлдснә тускар ода кен эс меднә. Хальмг улсин нер туурулҗ, өөдәнәр ачлгдад, баатр кевәр әмнәсн хаһцсн нег һазра дәәчин туурмҗнь мөңк болтха, -гиҗ генерал-майор Мальтинә Мергн санлын керг-үүлдвриг секв.
Лаганя района толһач Коган Юрий болхла келсн үгдән Баатриг бийинь, эк-эцкинь, өрк-бүлинь чигн сәәнәр меддгән темдглв. Нег һазра мана дәәч Северск балһс сулдхсна тускар Әрәсән Президентд дигтә-даратаһар тооцаһан өгсинь телеүзлин соңсхврт үзчкәд, седклнь байрар дүүрәд, бахтад икәр үүмсән чигн эн тодлв. Йоста офицерин үлгүр-үзмҗ болҗадг Очр-Һәрән Нарн даруһас орн-нутгин толһачин орлцлһтаһар болсн хургт чигн цергә кергән цань уга сәәнәр меддгән иткүлсинь Юрий Сергеевич бас онц темдглсн болдг. Нег үлү Лаганьд өсәд-боссн Әрәсән Баатрмуд Лиҗин Мингияна болн Очр-Һәрән Нарна җирһләр дамҗад эндрк баһчудыг сурһмҗлх кергтә гиҗ района толһач келсиг цугтан дөңнв.
Өдгә цагт Лаганя районас нег миңһн һар дәәч цергә шишлң керг-үүлдврт орлцҗадг болна. Эднлә бат залһлда бәрҗ, дару-дарунь буйнч седклтә дөң күргҗәхин тускар Коган Юрий бас келәд, нег һазра Баатрин санлд нерәдгдсн керг-үүлдврин бүрдәһәчнрт ханлтан өргв.
Дарунь түүмр унтралһна 2-ч тойгта әңгин һардач Оскин Александрт болн Әрәсән Баатрин көвүн Очр-Һәрән Юрийд санлын самбр секх күндтә зөв өггдв. «Төрскн нутгтнь, Лаганьд, эцкинм санл әрүнәр хадһлгдхнь мана өрк-бүлин, туслң мини төлә ик чинртә тоот болҗана. Энүнә санл мөңкрүлхин туст седвәр татад, ирлцңгү керг бүрдәсн болн санлын митингд ирҗ орлцсн цуг улст зүркни ханлтан өргҗәнәв», - гиҗ Юрий Наранович үүмҗ келв.
Төрскнәннь төлә әмән өгсн Әрәсән Баатрин, түүмр унтраһачнрин болн цуг дәәчнрин санлынь күндлҗ, эн керг-үүлдврт орлцачнр тагчг зогсв, хамдан көдлсн үүрмүднь болхла Очр-Һәрән Нарна санлд нерәдәд шишлң докъя өгв.
Шагҗин Любовь

Видео