Хамцу үүлдврин тускар күүндв

Сегодня, 12:45 | Общество, Таңһчин зәңгс, Зіњг

Хальмг Таңһчин Улсин Хуралын (Парламентин) Ахлач Артем Михайлов Әрәсән Федерацин Хургин элчнр Хачира Борисла болн Путән Байирла харһв. Регионмудын зака үүдәгч Хургудла бат залһлда бәрҗ, дигтә-даратаһар көдлҗ, нөкцҗ үүлдхин тускар харһлтд келгдв. Таңһчин депутатнрин седвәриг дөңнәд, нег һазра улсин сә хәәҗ хамдан көдлхнь мана һол күсл мөн гиҗ сенатормуд темдглв.

Әрәсән Федерацин Хургин элчнр таңһчин зака үүдәгч Хургин сессьт орлцҗ, терүнд хәләгддг төрмүдәр соньмсч, депутатнрин седвәриг орн-нутгин йосна бүрдәцст хаһлхд туслдгиг Артем Михайлов темдгләд, ханлтан өргв.Таңһчин Улсин Хуралын депутатнр сессин сүүр давулсн деерән регионмудын хоорндк керг-үүлдврмүдт шунмһаһар орлцдгин тускар зака үүдәгч Хургин Ахлач бас келв.
- Ода бидн Әрәсән Өмн үзгин Парламентсин ниицәнә хургт белдҗәнәвидн. Терүнд бидн эврәннь седвәрин тускар келхәр зуралҗанавидн. Бидн Әрәсән күч-көлснә болн социальн харслтын министр Антон Котяковд дуудвр кеһәд, «Өрк-бүл» келн-улсин төсвин «Олн үртә өрк-бүл» көтлврин йовудт шаңһа хазнас мөңг йилһхин седвәр орулвидн. Эннь таңһчд нилхд төрлһиг урмдуллһна керг-үүлдврмүд батлхд туслх, - гиҗ Артем Васильевич цәәлһв.
Сенатормуд хальмг депутатнрин седвәриг дөңнәд, таңһчин төлә эн ик чинртә төр болҗахиг темдгләд, энүг хаһллһнд орлцх болв. Харһлтын йовудт таңһчин социальн-экономическ делгрлтин нань чигн төрмүд босхгдв. Сенатормуд цааранднь чигн нөкцҗ хамдан үүлдҗ, бәәрн депутатнрин седвәр дөңнҗ орн-нутгин күцәгч йосна болн зака үүдәгч бүрдәцст тедниг хаһлхан иткүлв.
ДООҖАН Наталья

Видео