Нертә үүлдәчин өөнд нерәдв

Сегодня, 12:24 | Общество, Таңһчин зәңгс, Зіњг, Сурєуль-эрдм

Одахн Элстин политехникин колледжд байрин хург болв. СПО-н бүрдәцсин байрин Өдрт болн таңһчин олна үүлдәч Илья Ниманович Эльвартыновин 100 җилин өөнд эн нерәдгдв.
Колледжин һардач Васькинә Галина байрин хургиг нүр үгәр секв. «Давсн җил мана колледж 60 җилин өөнән темдглв. Эн җилмүдин эргцд мана сурһулин бүрдәц таңһчин эдл-ахун төлә 13 миңһн мергҗлтиг белдв. Тосхачнрин, маши залачнрин, уячнрин, өдгә эв-арһсин мергҗлтнрин эрдм дассн баһчуд эндр таңһчд көдлҗәнә. Дөрвн җил хооран мана колледжд Илья Эльвартыновин нерн зүүлһгдлә. Илья Ниманович кезә чигн колледжин бәәдл-җирһләр, оютнриг белдлһнә йовудар соньмсч, таңһчин ирлцңгү үүлдврин босхмҗд болн делгрлтд ик ач-тусан күргсмн»,- гиҗ Галина Васильевна темдглв.
Ода зуг мана колледжд таңһчин экономикин төлә электрикүдиг белдҗәнә. Эдн бас кесг бүрдәцст болн тосхлтын талвңгүдт көдлҗәнә. Одахн колледжин оютн Дорҗ - Һәрән Эрднь электрокүчнә төрмүдт нерәдсн нарт-делкән хургт орлцҗ тенд илдклән олнд соңсхв. Краснодарт болсн йиртмҗ харлһна бачм чинртә төрмүдт нерәдгдсн керг-үүлдврин жюри мана көвүг онц темдглҗ ачлв. Тиигҗ мана оютнр эрдмән дассн деерән номин-шинҗллтин халхар күцәмҗтәһәр үүлдҗәнә. Энүг нарт-делкән хургт сәәнәр белдсн төлә нүүрлгч багш Гульджухан Лариса Күндллһнә һашгар ачлгдв, гиҗ колледжин һардач Васькинә Галина йөрәв.
Тер мет таңһчин Улсин Хуралын (Парламентин) Ахлачин дарук Нуура Николай хургт орлцачнрт йөрәлин үгмүдән нерәдв. Җирн җил хооран секгдсн колледжд сурсн баһчуд таңһчин босхмҗд шунмһаһар орлцад, чинртә кесг бүрдәцсин һардачнрар, инженермүдин түрүн селгән болҗ көдлҗәлә. Тиигхд таңһчин һардач бәәсн Басан Городовиков болн терүнлә хамдан көдлҗәсн итклтә үр, партин таңһчин комитетин сегләтр, чадмг һардач, инженер Илья Эльвартынов тосхлтын болн нань чигн халхд ач-тусан күргсн болдг.
- Би эврән Илья Нимановичлә хамдан көдлҗәләв, тегәд энүг сәәнәр меднәв. Советин Союзин космонавтнрла, теднлә хамдан көдлҗәсн академик Глушкола Илья Ниманович өөрхн залһлда бәрҗәсмн. Хальмг Таңһчин экономик делгрүлхин төлә сансрт кесн зургуд олзлгдҗала, тер нөкцлтин нилчәр мана таңһч делгрәд бәәсмн, - гиҗ Николай Эрднеевич келсн үгдән темдглв.
Цааранднь колледжин багшнриг болн оютнриг таңһчин сурһуль-эрдмин болн номин министр Александр Ким йөрәһәд, дамшлтта багшнрт, тер тоод Гульджухан Ларисад болн Ниденә Байртад, колледжин һардачин селвгч Эрднин Александрад Күндллһнә һашгуд бәрүлҗ өгв.
Байрин хургин йовудт оютнр багшнртан нерәдсн шүлгүд умшад, олн келн-улсин би биилв. Хальмг Таңһчин күндтә иргн, олна үүлдәч Батыра Геннадий болн филолог номин кандидат Манҗин Николай байрин хургт бас орлцсинь заахмн.

ТҮРВӘН Һуна

Видео