• Көк теңгсин көвән нутгудын номтнрин ик хург

    Хулһн сарин 9-әс авн 10 күртл Казахстана Актау балһснд Көк теңгсин көвән орн-нутгудын номин шинҗллтин төвмүдин болн ик сурһульмудын негдлтин Ик хург болв. Б.Б.Городовиковин нертә Хальмг ик сурһуль энүнд бас орлцад, Салан Бадм илдкл кев. Көк теңгсин көвән эргндк бәәдл ясруллһна халхар кесг төр энд хәләгдв, тедниг дигтә-даратаһар хаһллһнд өдгә цагин номин болн сурһуль-эрдмин бүрдәцс хамцу үүлдҗ, шин эв-арһсиг өргнәр олзлх зөвтә болв.
    Актау балһснд болсн хургин хөөн хулһн сарин 25-ас авн 28 күртл Элстд нарт- делкән номтнрин болн шинҗләчнрин өргн харһлт болхмн. Нарт -делкәд учрҗадг гүн учр-утхта сольврин болн усн баһрҗадг таалд бәәдл нәрдәд йовна. Тегәд Көк теңгсин көвән кесг орн-нутгуд орҗадг регионд тогтурта бәәдл хадһлхин төлә шин седвәр татх кергтә. Тер төрәр номтнр болн шинҗләчнр Элстд болх хургт тоолврарн хувалцхмн. Тиим кевәр Актауд болсн Көк теңгсин туск күүндвр цааранднь давулгдхмн.

    • 17-10-2026, 13:20
  • Һурвн көвүндән үлгүр болна

    Әрәсән Президентин шиидврәр 2021 җиләс авн мана орн-нутгт хулһн сарин һурвдгч нарн өдрлә эцкин Өдр темдглдг болв. Эн сән өдрлә бидн эцкиннь ач-тус хәрүлҗ, бүлән үгән нерәдхәр адһнавидн. Сарпан района Кануковский селәнд бәәдг олн үртә эцк Антона Андрейиг (зургт) эн өдр һурвн көвүнь йөрәһәд, җирһлднь ицгтә түшг болдгинь темдглнә.

    • 17-10-2026, 13:10
  • Симфоническ оркестрин көгҗмин дүүрәнд

    Хальмг Таңһчд симфоническ оркестр бүрдәсн цагас авн 35 җил болҗана. Эн йовдлд нерәдәд, Элстд симфоническ оркестрин концерт болҗана.
    Хулһн сарин 18-д болх концертд көгҗмд дурта олн улс ирҗ орлцҗ чадҗана. Хальмгин нертә көгҗмч, Хальмгин Баатр Манҗин Аркадь бүрдәсн коллектив ода энүнә нер зүүҗәдг филармоня бәәрнд цуглрсн улсиг байрлулхмн.

    • 17-10-2026, 12:37
  • Хамгин сән дууч йилһгдх

    «Голос Калмыкии - 2026» гидг регионмуд хоорндк дууна марһан дарани кемдән билгтә улсиг цуглулҗана. Чонкушова Петрин нертә билг-эрдмин колледж XII марһанд белдвр эклҗәхин тускар зарлҗана.
    Эн марһан таңһчин көгҗмин үүлдврт ик чинртә йовдл болна. Билгтә баһчудыг йилһҗ авх арһ учрна.

    • 17-10-2026, 12:18
  • Нөкцлт: Хальмг Таңһч – Катар

    Шидр Хальмг Таңһчин Толһач Хаска Бату Әрәсәд Катарин күцц зөвтә элч зерг Ахмед Нассер Аль-Танила харһв.

    • 15-10-2026, 14:02
  • Аршан Зелмнд Бодь суврһс ясгдв

    Сарпан района Аршан Зелмн селәнд ясврин хөөн Бодь суврһс секгдв. Эн суврһс Икхурла арвна болн нег һазра ламнрт нерәдҗ босхгдсмн. Эн Баһ Дөрвдә әәмгә нертә болн өнр-өсклң арвн мөн. Бодь суврһс Аршан Зелмнд босхгдснь хара биш, тер юңгад гихлә хальмг хан Дондук-Омбо энд 1735 җилд Әрәсәд болн хальмг улст үнн кевәр церглхин туст андһаран өгсн болдг.

    • 15-10-2026, 13:57
  • Зурһан үртә Боктаевихнә күцәмҗ

    Урҗ өдр Москва балһснд Кремлевск бәәшңд «Җилин сән гисн өрк-бүл» Әрәсән марһанд диилвр бәрсн өрк-бүлмүдиг ачллһна байрин керг-үүлдвр болв. Әрәсән күч-көлснә болн социальн харслтын Министерств болн җирһлин күнд таалд туссн бичкдүдиг дөңнлһнә Саң эн марһаг 2016 җиләс авн давулҗана. Эн җил орн-нутгин марһанд ут тоодан 12 миңһн өрк-бүл орлцсн билә, теднәс 89 өрк дииләчнрин тоод орв. Олн үртә, баһ наста, тәвн һар җилдән хамдан болн селән һазрт бәәдг, Төрскән харсачин сән гисн өрк-бүлмүд мана ик орн-нутгин булң болһнд бәәдгнь бахмҗта. Үстин района Цаһан Амн селәнд бәәдг зурһан үртә Баатыр болн Екатерина Боктаевихн өнр-өсклң өрк-бүлмүд дунд диилвр бәрснь олн элгн-саднднь болн нег һазра улсиг икәр байрлулв.

    • 15-10-2026, 13:49
  • Цуг келн-улсин ниицлтиг батрулҗ

    Давсн мигмр өдрлә Элстд «Орн-нутгин болн келн-улсин бурхн-шаҗна негдлтсин хоорндк хәрлцән» гидг төрәр хург болв. Эн харһлт Хальмг Таңһчин мусульманмудын заллтын талвңд болв, энүг бүрдәлһнд эднә шаҗна Ар үзгин Кавказин зүүцүллһнә төв, исламин сойл, ном болн эрдм-сурһуль дөңнлһнә саң болн Хальмг Таңһчин залвр орлцв.

    • 15-10-2026, 13:32
  • Төрскн балһсан кеерүлий!

    Элст балһсна Хургин депутат, Хальмг Таңһчд «Справедливая Россия» партин әңгин ахлач Наталья Зинченко балһснд сән кец-таал тогталһна негдлт бүрдәхин седвәр татад, коммунальн цергллтсин көдләчнрин өдр болһни көдлмш үнлҗ ханлтан өргв.

    • 15-10-2026, 13:21
  • Төвдин эмнлһнә төв секгдв

    Шидр «Калмыкия» зәңгллһнә бүрдәцд болсн харһлтд төвдин эмнлһнә эмч Насна Санл болн эрүл-менд харлһна көдләч Бембин Ноһан орлцад, Элстд төвдин эмнлһнә төв секснә тускар зәңглв. Таңһчин зәңгллһнә бүрдәцин һардач Марила Хоңһр харһлтыг нүр үгәр секәд, эн хаврар «Төрскән харсачнр» саңгин таңһчд үүлддг әңглә хамдан цергә шишлң керг-үүлдврт орлцачнрин өрк-бүлмүдин төлә бүрдәгдсн буйнч седклин керг-үүлдврин тускар тодлулв. Терүнә йовудт Насна Санл болн Бембин Ноһан дәәчнрин өрк-бүлмүдин гешүдин эрүл-менд батруллһна керг күцәсн болдг. Марила Хоңһр эднд «Калмыкия» РИА-н Ханлтын бичг бәрүлҗ өгәд, төвин үүлдврт күцәмҗ дурдв.

    • 15-10-2026, 13:19

Видео