Көтчнрә района ах үйин улс күч-көлснә ветеран, медәт Мудункан Иваниг сәәнәр меднә. Олн җилдән эн Көтчнрә района бүрдәцст көдләд, залһлдана әңгин һардачин үүл дааһад, ачта амрлһндан һарсн болдг. Мөчн сарин 12-т Иван Дорджиевич 90 җилин өөнән темдглхмн.

Нижний Новгород балһснд шидр Нарт-делкән телекинон V хург көдлмшән төгсәв. «Новая реальность - 2026» гиҗ нерәдгдсн эн аһу ик кемҗәтә керг-үүлдвриг Әрәсән седкүлчнрин Ниицән бүрдәсмн. Әрәсән телекинон хургин лауреатнр дунд хальмг седкүлч Мукөвүнә Цаһана көдлмш темдглгдв.

Санкт-Петербург балһснд 2026-ч җилин экономикин нарт-делкән XXIX ик хург болв. Эн чинртә керг-үүлдвр 1997 җиләс авн давулгдҗана.
Эн җил делкән хургт 130 һар орн-нутгас ут тоодан 20 миңһн һар күн ирҗ орлцв. Күндтә гиич болад Саудовская Аравия орн-нутгин элчнр ирв, тер юңгад гихлә 2026 җилд Әрәсә эднлә дипломатин хәрлцә батлгдснас авн дигтә зун җил болв. Дөрвн өдртән болсн хургин йовудт олн зүсн төрмүдәр чинртә 150 харһлт болн сүүр давулгдв.

Әрәсән Баатр Очр-Һәрән Нарн цергә шишлң керг-үүлдвр эклснәс авн зөрмг кевәр дәәлдҗ, Соледар, Северск болн нань чигн балһсд-селәдт болсн ик дәәлдәнд залу-зөрмгән үзүлсмн. Эгл җолач болҗ цергә хаалһан экләд, батальона һардачин дарук болад, хамдан дәәлдҗ йовсн үүрмүдтән нүдн-амн болҗ цергә даалһвран күцәҗ йовсмн. Нидн Северск балһс сулдхлһнд Нарн Алексеевичин һардврт мана дәәчнр залу-зөрмгән үзүләд, хортна өмнәс дәврәд, дәәлдснә тускар эн Әрәсән Президент Владимир Путинд тооцаһан өгсиг бидн цуһар соңсад, нег һазра баатр бахмҗ үүдәлә.

Шидр «Госкорпорация по ОрВД» ФГУП-ин «Аэронавигация Юга» Аһшин төвин Элстин әңгин һучн җилин өөнд нерәдгдсн байрин хург болв. 1996 җилд мөчн сарин 1-д болсн шинрлтсин ашт Элстин әңг бүрдәгдәд, таңһчин хотл балһсна аэродромд аһарин җисә заллһна болн әәмшг уга бәәдл тетклһнә үүлдврән эн эклсмн. Эн җилмүдин эргцд әңгин мергҗлтнр Әрәсән Өмн үзгт әәмшг угаһар нисхин төлә ирлцңгү таал тогтаҗ, өдгә цага эв-арһс өргнәр олзлдг болад, таңһчд дигтә-дарата үүлдвр теткв. Байрин хургт олн җилин туршарт үнн-чик кевәр церглҗ йовдг мергҗлтнриг ачлад, бүрдәцин делгрлтд туслҗадг улсин тускар бүләнәр келв.

«Келн-улсин бахмҗ – 2026» гидг марһанд Хальмг Таңһчин әмтн орлцҗ чадҗана. Цугәрәсән олна мөрән VII марһанд орлцх улсин нердиг зааҗ болхмн. Әрәсән келн-улсин негдлт батллһнд болн этносойлын делгрлтд ач-тусан күргҗәдг улсин нердиг тер марһанд орулх арһ бәәнә.
«Келн-улсин бахмҗ - 2026» гидг мөрә олна үүлдврт, келн-улсин хоорндк хәрлцә делгрүллһнд орлцдг эврә сән дурар кедг олна көдлмш күцәҗәдг седвәртә үүлдәчнриг темдглх күслтәһәр үүдәгдсн болна.

Шидр Хальмг Таңһчин ачта улсин Хүүвин гешүд Хальмг Таңһчин Улсин Хуралын (Парламентин) депутат, «Делгрлтин күчн» җисәнә һардач Михаил Богатовла харһв. Эн җил моһа сард «Негдсн Әрәсә» партин хургин йовудт таңһчин ачта улсин Хүүвин ахлач Пашнана Эрднь «Делгрлтин күчн» гидг промышленностиг делгрүллһиг дөңнҗәдг олна җисә бүрдәлһнә седвәр орулсн билә. Шин җисәг таңһчин Улсин Хуралын (Парламентин) депутат Михаил Богатов һардҗ чадхмн, гиҗ Эрднь Лиджиевич ухан-тоолврарн хувалцсн билә, таңһчин Толһач Хаска Бату эн седвәриг дөңнәд, шин җисәнә һардачиг үүлднь батлсмн.

Б.Б. Городовиковин нертә Хальмг ик сурһулин номтнр бурхн-шаҗна сурһуль-эрдмиг болн номин шинҗллтиг дөңнлһнә саңгин марһанд диилвр бәрв. Шаҗна төрәр шинҗллт кеһәд, номта үүдәврмүд орчулхин туст марһан зарлгдсн билә. Марһанд эврә шинҗллтән орулснь – тууҗин номин доктор, «Евразийин делкәд өөрднр болн хальмгуд» гидг нарт-делкән номин-шинҗллтин төвин седкүлин ах редактор Бадмин Екатерина, номин хойр профессор Бичән Баазр болн Улана Мергн, филолог номин кандидат Менян Бадм болв.

Җил хооран Элстд Бурхн Багш һарсн, Гегәрлтин хаалһд орсн, махапаранирванад залрҗ һарсн өдрлә П. Жемчуевин нертә таңһчин эмнлһнә өөр Манла бурхна суврһн босхгдсн билә. Олн күн зальврҗ нааран ирнә.

Яшкулин района Цаһан Усн селәнд Эвин суврһна эргндк бәәриг ясч цеврллһнә көдлмш төгсв.
Эвин суврһн эн һазрин улс цуглулсн мөңгәр босхгдсмн. Суврһ тосхлһнд буйнч седклтә нань чигн улс дөңгән күргсмн. Ода шаҗна эн тосхлт селәнә паркд дүңгәҗ олн улсиг тосч авчана.