Симфоническ оркестрин көгҗмин дүүрәнд

Сегодня, 12:37 | Общество, Таңһчин зәңгс, Зіњг, Сойл

Хальмг Таңһчд симфоническ оркестр бүрдәсн цагас авн 35 җил болҗана. Эн йовдлд нерәдәд, Элстд симфоническ оркестрин концерт болҗана.
Хулһн сарин 18-д болх концертд көгҗмд дурта олн улс ирҗ орлцҗ чадҗана. Хальмгин нертә көгҗмч, Хальмгин Баатр Манҗин Аркадь бүрдәсн коллектив ода энүнә нер зүүҗәдг филармоня бәәрнд цуглрсн улсиг байрлулхмн.
Хальмг Таңһчин симфоническ оркестр үүдсн цагас авн шунмһа үүлдврәрн темдгтә болсмн. Көгҗмин зевсгүдин эн оркестр таңһчдан ор һанцхн иим коллектив болҗана. Хальмг оркестр көгҗмин олн-зүсн янзар бичгдсн үүдәврмүд күцәҗ, көгҗмин шин янзсиг чигн чадмгар олзлна.
Өөнин концертд европейск, орс, советск, болн хальмг көгҗмчнрин үүдәврмүд соңсч болхмн. Концертин көтлврn олн дунд тааслт олсн дуд, өдгә цага көгҗм бас орҗана.
Өөнин керг-үүлдврин бүрдәһәчнр болн оркестрин көгҗмчнр эн асхн ирсн улсиг байрлулх соньн олн тоот белдв.
Адыгея Республикин улсин артист, ах дирижер Аркадий Хуснияровин һардврт үүлддг хальмг көгҗмчнрин байрт орлцхар симфоническ оркестр ирҗәнә.
Санкт-Петербургас - Хальмг Таңһчин ачта артистк Очра Амулң, дууч Бадма-Хаалһин Байирта, Әәдрхнәс Шамситдин Мирзоев болн Илья Михайлов концертд ирҗ орлцхмн.
Хальмг Таңһчин улсин артистк Очкан Анна, Хальмг Таңһчин ачта артистк Инесса Месхишвили, Хальмг Таңһчин ачта артистк Наталья Спивак, артистнр Стелла Бородина, Дорҗин Лиҗ, Гришкинә Наталья, Брюгидикә Айса, Зулан Данзн, Баджан Бадм, Ванькан Александр өөнин концертд ирсн әмтиг байрлулхмн. Намрин сарин амрлһна нег өдриг Хальмг симфоническ оркестр тиигҗ көгҗмәрн кеерүлхмн.
ХӨӨЧИН Галина

Видео