Һурвн көвүндән үлгүр болна

Сегодня, 13:10 | Общество, Таңһчин зәңгс, Зіњг

Әрәсән Президентин шиидврәр 2021 җиләс авн мана орн-нутгт хулһн сарин һурвдгч нарн өдрлә эцкин Өдр темдглдг болв. Эн сән өдрлә бидн эцкиннь ач-тус хәрүлҗ, бүлән үгән нерәдхәр адһнавидн. Сарпан района Кануковский селәнд бәәдг олн үртә эцк Антона Андрейиг (зургт) эн өдр һурвн көвүнь йөрәһәд, җирһлднь ицгтә түшг болдгинь темдглнә.
Андрей Григорьевич Светлана Борисовна авальтаһан хөрн шаху җилдән ниитә бәәнә. Темир, Санчр болн Заян көвүднь эк-эцкиннь төлә сән үрд болҗ өсчәнә, эдн сурһулян сәәнәр сурад, спортан соньмсч, олна бәәдл-җирһлд шунмһаһар орлцна. Темир Шарту балһснд юристин эрдмәр сурчана. Санчр Заян хойр сурһульчнр мөн. Санчр ода 10-ч класст сурна, эн иргчдән зөв-йосна халхар сурхар зуралҗана. Отхн Заян болхла эмч болх саната, ода эн 2-ч класст сурчана. Көвүд бичкнәсн авн эцкән дахад герин көдлмш кеҗ, мал асрхд нөкд болна. Селән һазрт өсәд-боссн эк-эцкнь өркән өндәлһсн цагас авн мал бәрәд, сад-һарудтан олн зүсн темс болн зер-земш урһана. Дөңцл эдл-ахудан хөд, үкрмүд, така бәрҗ, өрк-бүлән теҗәнә. Көвүд зуни кемд өрүн эрт босад эцктәһән малд хот белдҗ, хаша-хаацан ясч, нань чигн көдлмш кенә.
- Эцк күн көвүдт чик сурһмҗ өгч, үлгүр-үзмҗ болх зөвтә. Би көвүдтән ямр нег селвг өгч, олн зүсн төрәр күүндҗ, мал асрлһна туст чигн цугинь зааҗ өгнәв. Бидн сул цаган хамдан давулнавидн, көвүд чик авг-бәрцлә ирлцҗ, цогц-махмудан батрулх зөвтә гиҗ селвг өгнәв. Эдн волейболар соньмсна, тегәд Садовое селәнд эдниг күргҗ, чаңһ-чиирг болҗ өсхиг урмдулнав. Би эврән баһ цагтан гитар цокдг биләв, ода хойр эләднь бас гитар цокна, тегәд хамдан ду дуулнавидн, - гиҗ Андрей Григорьевич келнә.
Герин эзн урднь «Рассвет» эдл-ахуд, района эмнлһнд көдлдг билә, 2018 җиләс авн эн Баһ Дөрвдә медәтнрин болн гемтә-шалтгта улсин гер-интернатд көдлҗәнә. Авальнь бас тенд көдлнә, Светлана Борисовна эрүл-менд харлһна көдләч болна. Андрей Григорьевичин нилчәр социальн бүрдәцд дулан болна, дигтә эн өдрмүдт дулаһар тетклһнә кем эклсн бәәнә. Медәтнр ямр нег эвдрсн тоот ясхиг, лавкд хулд кехиг сурхла, өр-өвч, сән седклтә Антона Андрей эднд дөң-нөкд болхар адһна. Дааврта, дигтә-дарата төләднь медәтнр энүг күндлнә.
Маңһдур, эцкин Өдрлә Антоновихнә өрк-бүл ширә эргҗ сууһад, килмҗтә эцкән йөрәхмн, көвүднь эврән кесн белгән бәрүлҗ өгх. Темир, Санчр болн Заян эцкдән йир дурта, йоста залус болхар шунна. Эцкиннь үлгүрәр эдн көдлмшч болн төрскнч седклтә улс болҗ өсхнь лавта.
ДООҖАН Наталья

Видео