Көк теңгсин көвән нутгудын номтнрин ик хург

Сегодня, 13:20 | Общество, Таңһчин зәңгс, Зіњг, Сурєуль-эрдм

Хулһн сарин 9-әс авн 10 күртл Казахстана Актау балһснд Көк теңгсин көвән орн-нутгудын номин шинҗллтин төвмүдин болн ик сурһульмудын негдлтин Ик хург болв. Б.Б.Городовиковин нертә Хальмг ик сурһуль энүнд бас орлцад, Салан Бадм илдкл кев. Көк теңгсин көвән эргндк бәәдл ясруллһна халхар кесг төр энд хәләгдв, тедниг дигтә-даратаһар хаһллһнд өдгә цагин номин болн сурһуль-эрдмин бүрдәцс хамцу үүлдҗ, шин эв-арһсиг өргнәр олзлх зөвтә болв.
Актау балһснд болсн хургин хөөн хулһн сарин 25-ас авн 28 күртл Элстд нарт- делкән номтнрин болн шинҗләчнрин өргн харһлт болхмн. Нарт -делкәд учрҗадг гүн учр-утхта сольврин болн усн баһрҗадг таалд бәәдл нәрдәд йовна. Тегәд Көк теңгсин көвән кесг орн-нутгуд орҗадг регионд тогтурта бәәдл хадһлхин төлә шин седвәр татх кергтә. Тер төрәр номтнр болн шинҗләчнр Элстд болх хургт тоолврарн хувалцхмн. Тиим кевәр Актауд болсн Көк теңгсин туск күүндвр цааранднь давулгдхмн.
Көк теңгсин көвән орн-нутгудын ик сурһульмудын негдлтд көдлсн кемд Хальмг ик сурһулин һардвр болн багшнр номтнрин цаг зуурин нарт -делкән тавн баг бүрдәв. Эдн цугтан даалһвран күцәв. Аштнь эдн РНФ-ин мөрә шүүҗ авхар эрлһән орулв, хамцу статья барлҗ бәрмт цаас белдв.
2022 җилд Хальмг ик сурһулин седвәрәр Көк теңгсин көвән йиртмҗиг харслһна болн терүнә шинҗллт келһнә халхар нарт -делкән баһчудын төв бүрдәгдлә. Төвин дөңгәр экспедицс, сурһуль-эрдмин кесг көтлвр болн волонтермудын төсв күцәгднә. «Хар һазр» гидг харлһна талвңгин улд экологин нарт -делкән сурһуль бүрдәгдв.
2024 җилд бас Хальмг ик сурһулин седвәрәр Ниигмин Дорд үзгин ик сурһуль бүрдәгдв, Әрәсән, Казахстана, Моңһлын, Китдин, Узбекистана болн Киргизин вузмуд терүнә ханьд орв. Казахстана вузмудла нарт -делкән 9 бооцан батлгдла, 200 мергҗлт белдгдлә, сольлцана таалд 250 оютн болн багшнр медрлән гүүдүлв. 2012 җиләс авн Элстд хасг номин болн сойлын төв үүлдҗәнә.
Көк теңгсин көвән ик сурһульмудын нөкцлтиг өргҗүлхин төлә Хальмг ик сурһулин һардвр болн номтнр эврә сүв-селвгән орулв. Тер тоод номин болн сурһуль-эрдмин таал тогталһн ик чинр зүүҗәнә гиҗ заагдв. Негдлтин ханьд ик сурһульмуд хоорнд «Көк теңгсин көвән орн-нутгудын кадрмуд. Эргндк бәәдл» гидг мергҗлтнриг белдлһнә төв бүрдәҗ, теднә нөкцлтиг ниигмин сүлҗәнә таалд өргҗүлҗ болҗана гисн седвәр бас орулгдв.
Тер мет «Көк теңгсин көвән кампус» гидг тавн орн-нутгин ик сурһульмудын негдлтд хамцу көтлврәр эргндк бәәдлин, усна көрңгин болн тогтурта делгрлтин төрмүд шинҗлҗ, оютнрин сольлцаг чигн бүрдәҗ болҗана, Хальмг ик сурһуль эн даалһвриг күцәхдән белн бәәнә гиҗ келгдв.
Тер мет баһ наста номтнрин төлә стипендь һарһҗ, терүнә дөңгәр теднә төсвс күцәлһиг урмдулҗ болҗана. Эргндк бәәдлин төр хаһллһна, сойл делгрүллһнә болн нань чигн төрмүдәр селвг бас өггдв. Хальмг Таңһчин болн Хальмг ик сурһулин төлә эн ик хургт орлцснь ик чинр зүүҗәнә. Тиим кевәр талдан орн-нутгудын номтнрла нөкцлтән делгрүлҗ, хамцу шин төсвин тускар улм тодрха күүндвр кеҗ болҗана.

ТҮРВӘН Һуна

Видео