Цуг келн-улсин ниицлтиг батрулҗ

Сегодня, 13:32 | Общество, Таңһчин зәңгс, Зіњг

Давсн мигмр өдрлә Элстд «Орн-нутгин болн келн-улсин бурхн-шаҗна негдлтсин хоорндк хәрлцән» гидг төрәр хург болв. Эн харһлт Хальмг Таңһчин мусульманмудын заллтын талвңд болв, энүг бүрдәлһнд эднә шаҗна Ар үзгин Кавказин зүүцүллһнә төв, исламин сойл, ном болн эрдм-сурһуль дөңнлһнә саң болн Хальмг Таңһчин залвр орлцв.
Таңһчин күцәгч йосна болн зака үүдәгч бүрдәцсин элчнр, Элстин сурһульмудын арвтнр, багшнр, олна үүлдәчнр болн шинҗләчнр бас эн хургт орлцсинь заахмн. Таңһчин мусульманмудын шаҗна заллтын ахлач, муфтий Солтанахмед Каралаев харһлтыг нүр үгәр секәд, Дагестанас, Сарпулин крайәс, Ар үзгин Осеть-Аланяс, Карачаево-Черкессәс, Адыгеяс ирсн шаҗна бүрдәцсин элчнрлә таньлдулв.
- Мана хург Әрәсән улсин ниицлтин җилд болҗана. Кесг зун җилин туршарт Әрәсә олн келн-улсиг хамцулҗ, теднә сойлын делгрлтд нилчән күргҗәнә. Цуг шаҗна бүрдәцс эндр өдр хамцу кевәр үүлдҗ орн-нутгт ни-негн, эвин бәәдл батруллһнд туслҗана. Тернь мана ик орн-нутгин үнтә зөөрнь болҗана. Кесг олн улсин шаҗна хургуд-харһлтсиг бүрдәлһн цуг халхар эвин болн тогтурта бәәдл батруллһна болн дигтә-дарата делгрлтин ул-сүүрнь болна, - гиҗ шаҗна бүрдәцин ахлач онц темдглв.
Орн-нутгин болн шаҗна бүрдәцсин хоорндк хәрлцән яһҗ тогтагдсна туск тууҗиг баһчуд медх зөвтә гиҗ санҗанав. Терүнә улд келн-улсин хамцлт батрна, әмтн хоорндан ниитә бәәнә, тиим зокалар кесг келн-улсин бурхн-шаҗн өргнәр делгрҗ, орн-нутгин күчн өснә. Тер авъясар ул кеҗ бидн эндрк күчр-күндиг давҗ һарад, кен-негән дөңнҗ, мадниг даҗрхар седҗәдг хортна үүлдвриг уурулх зөвтәвидн, гиҗ муфтий заав.
Хальмг Таңһчин Улсин Хуралын (Парламентин) Ахлач Артем Михайлов үг авад, эн хург нөкцлтин, келн-улсин болн шаҗна хоорндк хәрлцәнә кесг төр хәләҗ, мана регионмудт эвин бәәдл батрултха гиҗ дурдв. «Әрәсәд кесг келн-улс бәәнә, кесг шаҗн делгрҗ йовна. Нег үлү ода деед үзгин орн-нутгуд мадн тал дәврәд нам уга кехәр седҗәх кемд бидн ниитә, бат бәәдлән үзүлҗ, Әрәсән делгрлтин, уралан зөрлһнә халхар улм сән таал тогтах зөвтәвидн, мана кесг келн-улсин хамцу үүлдвр терүнә һол сүүрнь болх зөвтә.
Эврәннь орн-нутгтан итклтә болҗ, кен ахан күндлҗ, үүрмүдтән иткҗ, тер авъясан баһчудт сурһмҗлҗ мана хамцу бәәдлиг чаңһаҗ үүлдҗәнәвидн. Таңһчин Улсин Хурал (Парламент) олна болн шаҗна керг- үүлдврт орлцҗ таңһчд болн орн-нутгт эвин, тогтурта бәәдл батруллһна авъясиг делгрүлҗәнә. Мана кесг келн-улсин бурхн-шаҗна бүрдәцс дунд үр-иньгин, ах-дүүһин хәрлцән өргнәр делгрҗәхиг дөңнҗ, терүнә төлә ирлцңгү таал тогтаҗана. Хальмг Таңһчд 97 һар келн-улсин элчнр ниитә бәәнә. Кен-негндән дөң болҗ, авъясан делгрүлҗ, талдан регионмудт чигн үлгүр болна. Үлгүрнь, одахн Дагестанд учрсн аюлас көлтә кесг әмтн гер-бүүрән гееһәд зовлңла харһв, Хальмг Таңһчин әмтн теднд дөңгән күргснь темдгтә болв.
Тер мет Элстд шаҗна ик хург болв, Христос бурхн Элстин орс чонҗд бууҗ ирснә 80 җилин өөнд нерәдсн ик керг-үүлдвр бас давв. Кесг орн-нутгин болн олн һазрас ирсн элчнр терүнд орлцв, теднд бидн бас ханлтан өргҗәнәвидн, маднла сән хәрлцә бәрҗ, энд болсн ик чинртә йовдлын тускар эдн эврә әмтндән келҗ өгв, тиигҗ орн-нутгуд болн регионмуд хоорнд эвин бәәдл батрна, тер авъясан бидн цааранднь күцәх зөвтәвидн», - гиҗ Артем Васильевич темдглв.
Цааранднь таңһчин Улсин Хуралын Ахлач мусульманмудын муфтий Солтанахмед Каралаевд, Бурхн багшин Алтн сүмин гелң Тубтен Цультимд, Элстин Орс чонҗин элч Алексий Грищенкод шунлттаһар үүлдҗәдг төләднь Улсин Хуралын (Парламентин) Ханлтын һашгуд бәрүлҗ өгв.
Цааранднь йосна бүрдәцсин элчнр, шинҗләчнр, номтнр, багшнр болн ирсн күндтә гиичнр Әрәсән келн-улсин политикин һол төрмүдин, шаңһа болн шаҗна бүрдәцсин нөкцлтин, мана орн-нутгин келн-улсин авъясиг болн шагшавдын зокалыг батруллһна, терүнә улд сурһмҗин көдлмш делгрүллһнә болн нань чигн төрмүдәр селвлцв.
ТҮРВӘН Һуна

Видео