Зурһан үртә Боктаевихнә күцәмҗ

Сегодня, 13:49 | Общество, Таңһчин зәңгс, Зіњг

Урҗ өдр Москва балһснд Кремлевск бәәшңд «Җилин сән гисн өрк-бүл» Әрәсән марһанд диилвр бәрсн өрк-бүлмүдиг ачллһна байрин керг-үүлдвр болв. Әрәсән күч-көлснә болн социальн харслтын Министерств болн җирһлин күнд таалд туссн бичкдүдиг дөңнлһнә Саң эн марһаг 2016 җиләс авн давулҗана. Эн җил орн-нутгин марһанд ут тоодан 12 миңһн өрк-бүл орлцсн билә, теднәс 89 өрк дииләчнрин тоод орв. Олн үртә, баһ наста, тәвн һар җилдән хамдан болн селән һазрт бәәдг, Төрскән харсачин сән гисн өрк-бүлмүд мана ик орн-нутгин булң болһнд бәәдгнь бахмҗта. Үстин района Цаһан Амн селәнд бәәдг зурһан үртә Баатыр болн Екатерина Боктаевихн өнр-өсклң өрк-бүлмүд дунд диилвр бәрснь олн элгн-саднднь болн нег һазра улсиг икәр байрлулв.
Боктаевихнә өрк-бүл района болн таңһчин бәәтхә, Әрәсән болн нарт-делкән марһаст шунмһаһар орлцҗ, нер һарна. Аюка, Баина, Айтин болн Амрхан Цаһан Амна гимназин йилһән сән сурһульчнр мөн, кичәлмүдин хөөн эдн көгҗмин сурһульд болн спортын кичәлмүдт орна. Көвүд сул бөк бөрлдәнә халхар, таңһчин болн Әрәсән марһаст диилвр бәрнә. Баина болн Айтин «Харадас» ансамбльд дуулна. Дәкәд Аюка болн Айтин орн-нутгин марһанд темдглгдсн фильмд орлцсн билә. Тавта Айтсан болн хө мөстә Аршан «Алтн булг» бичкдүдин садт орна, эдн бичкн бийнь ахнрасн үлгүр авч өсчәнә. Эдн «Өрк-бүлин хөвтә-кишгтә кем» гидг зургудын марһанд диилвр бәрлә, хаалһин җисәнә зокалар болсн таңһчин марһанд бас ончрла. Нидн болхла эдн «Энтн мана өрк-бүлин авъяс» гидг Әрәсән марһана Өмн үзгин дуһргин девсңд диилвр бәрәд, орн-нутгин марһана ашлгч девсңд орлцад, Калининградт амрх путевкар ачлгдла.
Баатыр Екатерина хойр күүкдиннь билг-эрдм делгрүллһнд, төрскнч сурһмҗ өглһнд, өвкнриннь авъяс хадһллһнд ик оньган өгнә. Екатеринан экнь Музгана Валентина олн җилдән арһлач болҗ үүлдҗәнә, тегәд күүкн-күргнь энүнд кергән делгрүлхд дөң-нөкд болна. Эдн өрк-бүләрн цергә шишлң керг-үүлдврт орлцҗадг нег һазра улсиг дөңнҗ буйнч седклин кергт демән күргдгин тускар Кремлевск бәәшңд болсн байрин нәәрт келгдв. Эн керг-үүлдврин йовудт хальмг хувцта Боктаевихн тәәз деер һарч ирәд, Әрәсән Президент Владимир Путинә зургта туг делскв.
- Бидн өрк-бүләрн Москва балһснд һурвн өдртән бәәһәд, орн-нутгин кесг һазрас ирсн бүлмүдлә таньлдвидн. Мана төлә соньн көтлвр тогтагдв, өрк-бүлмүд нег-негндән белгүд бәрүлҗ өгв, хотл балһсна һәәхмҗтә ормс хәләҗ экскурьст одвидн. «Өрк-бүлин асхн» гидг керг-үүлдврт 89 регионас зуг 19 элчиг шүүҗ авад, билг-эрдмән үзүлх арһ өгв. Аюка теднә тоод орад, өрк-бүлин туск шүлг айслулҗ умшв. Эн өдрмүд мана өрк-бүлд кесгтән мартгдшгонь маһд уга. Хальмг Таңһчин нер һарһад, Әрәсән марһанд диилвр бәрснь мадниг улм хамцулҗ, ик урмд өгв, - гиҗ олн үртә Екатерина келнә.
Орн-нутгин марһанд диилвр бәрсн өрк-бүлмүдиг Әрәсән Залврин Ахлачин дарук Татьяна Голикова, Әрәсән Орн-нутгин Хүүвин Ахлачин дарук Анна Кузнецова, «Төрскән харсачнр» Саңгин ахлач Анна Цивилева,Әрәсән күч-көлснә болн социальн харслтын министр Антон Котяков йөрәһәд, ачлвринь бәрүлҗ өгв.

ДООҖАН Наталья

Видео