Төвдин эмнлһнә төв секгдв

Сегодня, 13:19 | Общество, Таңһчин зәңгс, Зіњг

Шидр «Калмыкия» зәңгллһнә бүрдәцд болсн харһлтд төвдин эмнлһнә эмч Насна Санл болн эрүл-менд харлһна көдләч Бембин Ноһан орлцад, Элстд төвдин эмнлһнә төв секснә тускар зәңглв. Таңһчин зәңгллһнә бүрдәцин һардач Марила Хоңһр харһлтыг нүр үгәр секәд, эн хаврар «Төрскән харсачнр» саңгин таңһчд үүлддг әңглә хамдан цергә шишлң керг-үүлдврт орлцачнрин өрк-бүлмүдин төлә бүрдәгдсн буйнч седклин керг-үүлдврин тускар тодлулв. Терүнә йовудт Насна Санл болн Бембин Ноһан дәәчнрин өрк-бүлмүдин гешүдин эрүл-менд батруллһна керг күцәсн болдг. Марила Хоңһр эднд «Калмыкия» РИА-н Ханлтын бичг бәрүлҗ өгәд, төвин үүлдврт күцәмҗ дурдв.
- Б.Б.Городовиковин нертә Хальмг ик сурһулин санаторь-профилакторин улд бидн «Ноһан дәрк» гидг төвдин эмнлһнә болн реабилитацин төв секвидн. Тенд эмнсн деерән бидн сурһулин керг-үүлдврмүд давулхар зуралҗанавидн. Хальмг ик сурһулин һардач Салан Бадм болн санаторь-профилакторин ах эмч Джексембекә Любовь эн төв секлһнә седвәриг дөңнәд, бәәр йилһҗ өгснд бидн ханлтта бәәнәвидн. Таңһчин эрүл-менд харлһна көдләчнр, йирин улс чигн сурһуль сурад, төвдин эмнлһнә туст мергҗлтән өөдлүлҗ чадхмн. Хөөннь райодын эмнлһст мана төвин әңгүд секх зура бас бәәнә, тегәд таңһчин селәдт бәәдг әмтн эрүл-мендән батрулҗ чадхмн, - гиҗ Санл Юрьевич келв.
Харһлтд орлцачнрин тоолврар, мана таңһчд эмнлһнә зуульчллһ делгрүлх кергтә. Мана таңһчур ирдг кесг гиичнриг шаҗна, төвдин эмнлһнә төрмүд соньмсулна, тегәд эн халх делгрүлҗ, олн зүсн туслмҗ күрглһнә төвмүд секхлә, нааран ирх зуульчнрин то өсхнь лавта. Насна Санл БРИКС-ин эрүл-мендин ик сурһулин төвдин эмнлһнә тиңкмин һардач мөн, тегәд энүнд төвдин эмнлһнә сурһуль бүрдәх зөв бәәдгчн.

БАТАН Сәәхлә

Видео