Эдл-ахун өөн

Сегодня, 13:09 | Общество, Таңһчин зәңгс, Зіњг

Шидр Ик Буурла района Зунда Толһа селәнд «Чограйский» эдл-ахун 50 җилин өөнд нерәдгдсн байрин хург болв. Селәнә бәәрн әмтн, күндтә гиичнр байрин керг-үүлдврт орлцад, селәнә эдл-ахун тууҗ тодлад, олн җилдән үнн-чик седклтәһәр көдлҗ йовсн улсин ач-тусинь темдглв.
Селәнә эдл-аху 1976 җилд «Кевюдовский» совхозин 2-ч болн 4-ч фермсин улд бүрдәгдсн болдг. Эдл-аху хөд асрлһна халхар күцәмҗтәһәр көдлҗ йовсмн. Совхозин улд Зунда Толһа селән тогтагдсмн.
Хальмг Таңһчин Улсин Хуралын (Парламентин) Ахлач Артем Михайлов илгәсн йөрәлин бичг терүнә дарук Бадмин Вячеслав олнд умшҗ соңсхад (зургт), Зунда Толһа селәнә әмтнд күцәмҗ дурдв. Эдл-ахун нилчәр селән делгрәд өсәд-өргҗәд йовв, гиҗ байрин хургт орлцачнр тодлв. Олн җилдән эн эдл-ахуд көдлҗ йовсн улс Күндллһнә һашгудар ачлгдв, зәрмнь Ик Буурла района күндтә иргнә нер зүүв.
Района үүдәгч коллективс билг-эрдмән үзүләд, байрин концертд орлцв. Эн өдр бичкдүдин төлә нәр-наадд бүрдәгдв, спортын марһас болв. Селәнәхн сергмҗтәһәр амрад, төрскн һазрин делгрлтд ач-тусан күргсн улсиг тевчәд, хамдан эдл-ахун өөниг темдглснь эднд байр-бахмҗ үүдәв.

ДООҖАН Наталья

Видео