Эн намрин сармуд дулан өдрмүдәр мадниг байрлулв. Зуг зәрмдән киитрәд чигн бәәв. Нарта өдрәр Элстин төв уульнцсар болн паркст әмтн сандл деер сууһад амрчахиг үзҗ болв. Ода өрүн болһн зөвәр серүн болна гиҗ келх кергтә, зәрмдән салькн чигн көдлнә. Сөөһәр болхла, гермүдт киитн болад, цуһар дулаһар тетклһнә кемиг күләҗәнә. Намр гүргүдән орчкв, намрин өдрмүд дулан киитн чигн болад нег-негән соляд бәәнә.

Цергә шишлң керг-үүлдврт орлцачнрин болн терүнә йовудт әмнәсн хаһцсн дәәчнрин өрк-бүлмүдин элчнр Адыгея Республикд болх «Әрәсән күүкд улсин зүркн» нертә наадмд орлцхар белдҗәнә. Терүнд Өмн үзгин болн Ар Кавказин дуһргудын 14 региона элчнр орлцхинь күләгдҗәнә.

Элст балһсна поликлиникд гриппәс саглуллһна туст тәрлһ кедг «Флю-М» и «Совигрипп» нертә эм ирв. Нурһлҗдан намрин-үвлин цагт әмтн царцад, гриппәр гемннә. Энүнәс саглулхин төлә җил болһн олн-әмтн тәрлһ келһнә керг-үүлдврт орлцна.

Хулһн сарин 5-д, Элстд залврин герт багшин өдрт нерәдсн байрин хург болв. Сән өдрләнь таңһчин Толһач Хаска Бату йөрәв. Сурһулин хөөн бас багшин эрдм дасчасан тодлв. Энүнд Ленинә нертә Москван багшин күрәлңд сән медрл болн сурһмҗ өгв. Тегәд чигн ода йирин әмтнлә, һардачнрла, һазадын орна делегацсла күүндвр кехд тер медрл ик дөңгән күргнә, гиҗ Бату Сергеевич темдглв.

Үвлзлһнд малын хот белдлһн цуг эдл-ахусин төлә хамгин чинртә кем болна. Сәәнәр белдхин төлә малчнр ик көдлмш күцәнә. Тер көдлмшин йовудыг түргдүлхин, малын хотын кемҗәг икдүлхин, шим-шүүсинь элвҗүлхин төлә Хальмг ик сурһулин номтнр болн «Булһн-трейд Агро» бүрдәцин көдләчнр иим янзта төсвиг күцәмҗтәһәр делгрүлҗәнә.

Одахн Хальмг ик сурһульд номин-дамшлтын хург болв. Германьд дәәнә хөөн Нюрнбергин зарһ 80 җил хооран төгссн йовдлд эн керг-үүлдвр нерәдгдв. 1945 җилин хөн сарин 9-д Советин Союз Төрскән харсгч Алдр дәәнд диилвр бәрв. Болв тер аврлт уга дәәнд мана орн-нутг 27 сай иргнән геев, Европин орн-нутгудын геедрлтиг немхлә, 54 сай күн делкән хойрдгч дәәнд әмнәсн хаһцла. Кесг то балһсн болн селән бомбдлһнд тусад, шатагдад уга кегдлә, тенд бәәсн арвад сай әмтн, бичкдүд, медәтә болн күүкд улс дәәнә һалвд әмән геев.

Цергә шишлң керг-үүлдвр болҗадг һазрт белдвр кегддг нег бәәрнд түрүн хурл секгдв. «Төв» цергә багин дәәчнр терүг босхҗ авсмн. Дәәлдәнә һазрас невчк ууҗм һазрт дәәчнр эврә һарарн хурлан тосхв. Хурл дотр мөргүлин төлә цуг тоотнь бәәнә. Шаҗна үүлдврт кергтә тоотыг Тыван һардвр нааран илгәсмн.

А.Амр-Санана нертә Келн-улсин дегтрин саңд хулһн сарин 1-д ик байрта йовдл болв. Дегтрин саңгин көдләчнр умшачнртан нерәдәд, шин хойр талвң секв. Сәәхн аһута талвңгин негнь – «Негдлтин бәәрн» нер зүүв. Дәкн нег талвң бичкн умшачнрт нерәдсн сойлын гегән-герлин аһу «Бичкдүдин сойлын делгрлт» гиҗ нерәдгднә. Байрин үүлдврт орлцхар олн умшачнр, сойлын көдләчнр, келн-улсин ниицәст орлцачнр, дегтрт дурта олн күн цуглрв.
Келн-улсин дегтрин саңгин һардач Безидеева Майян келсәр, өдгә цага некврлә ирлцүлҗ, умшачнр цуглрҗ ирдг бәәрнд сольвр орулҗ, сән таал тогталһнд Цугәрәсән марһанд мана дегтрин саң диилвр бәрсн йовдл ик дөң болв.

Хальмг Таңһчин Толһач Хаска Бату Росгвардин ханьд ордг ОМОН-а цергчнриг сән өдрләнь йөрәв.

Одахн цергә шишлң керг-үүлдвр давҗадг һазрас Харьковск зөрүллтд кергән күцәҗ йовдг «Бархан» дуудврта Хальмгин дәәч видеозурц илгәв. Тенд керглгдҗәдг тоотын тускар келәд, нег һазра улсас нөкд болхиг сурв. Шишлң көлгн, радиостанц, генератор, модн, хадасн болн талдан олн тоот керглгдҗәхинь медгдв.