Орн-нутгин иргнмүдиг өскчәнә

08-10-2026, 12:39 | Общество, Таңһчин зәңгс, Зіњг

Хулһн сарин 5-д, Элстд залврин герт багшин өдрт нерәдсн байрин хург болв. Сән өдрләнь таңһчин Толһач Хаска Бату йөрәв. Сурһулин хөөн бас багшин эрдм дасчасан тодлв. Энүнд Ленинә нертә Москван багшин күрәлңд сән медрл болн сурһмҗ өгв. Тегәд чигн ода йирин әмтнлә, һардачнрла, һазадын орна делегацсла күүндвр кехд тер медрл ик дөңгән күргнә, гиҗ Бату Сергеевич темдглв.
- Тадн дааврта көдлмш күцәҗәнәт. Терүг бидн өөдәнәр үнлҗәнәвидн, мана ниигмин ицгтә ул-сүүрнь болҗанат. Мана таңһчд тадниг цугтан күндлнә. Бидн амр биш цагт бәәнәвидн, болв тер күчр-күндиг нег-негнәннь дөңгәр диилх зөвтәвидн, - гиҗ Хаска Бату заав.
Хургин йовудт цергә шишлң керг-үүлдвр давҗадг һазрт әмнәсн хаһцсн Элстин этносойлын гимназин физическ сойлын багш Мирхат Уразалиевд шаңһа ачлвр өглһнә керг-үүлдвр күцәгдв. Делгә Эрднин медалиг –эк-эцкднь болн өрк-бүлднь таңһчин Толһач Хаска Бату бәрүлҗ өгв. Мирхат эврә дурар тиигәрән одв, эврә өрк-бүлән болн элгн-садан харснав гиҗ санаһан медүләд, дәәлдәнә һазрт одв гиҗ экнь тодлҗ хургт орлцачнрт хөв-кишг болн сән-сәәхн җирһл дурдҗ, таңһчин һардврт болн социальн харслтын бүрдәцст ханлтан өргв.
Хальмг Таңһчин күндтә иргнә өөдән нерн Нора Намд зүүлһгдв. Темдгинь болн тасминь Бату Сергеевич зүүлһв. Нора Енамовна олн җилдән Элстин 4-ч тойгта сурһульд географин багш болҗ көдлв. Тер мет Хальмг Таңһчин ачта багшин күндтә нерн олн улст зүүлһгдв. Эдниг өөдән ачлврлань таңһчин Толһач йөрәҗ, темдгинь болн иткл цаасинь бәрүлҗ өгв. Тер тоод Элстин 2-ч тойгта сурһулин багш Бадман Наталья, Үст селәнә дунд сурһулин багш Баган Ноһан, Элстин коррекцин сурһуль-интернатын багш Бартуна Надежда болн талдан көдләчнр ачлгдв.
Дарунь Әрәсән Федерацин ачта багшин өөдән нерн Элстин классическ гимназин багш Мацга Светланад зүүлһгдв. Тер мет Әрәсән Президентин мөрәһәр Элстин лицейин багш Лиҗин Нина болн Элстин 3-ч тойгта сурһулин багш Манҗин Виктория, Городовиковск гимназин багш болн селвгч Наталья Шевцова ачлгдв. Эднд өөдән ачлвринь федеральн ах инспектор Александр Беляев бәрүлҗ өгәд, багшнриг йөрәв.
Цааранднь таңһчин залврин Ахлач Босхмҗин Гилән багшнриг темдглв. Багшин көдлмшт таңһчин һардвр һол оньган өгчәнә. Селән һазрт көдлмшт йовҗадг баһ наста багшнрт болн сурһмҗлачнрт демин мөңгн кесг кемҗәнд өсв. Багшнрин күч-көлснә таалыг ясрулхин төлә сурһульмудт болн садмудт бат ясвр кегдҗәнә, тер көдлмш цааранднь чигн күцәгдх гиҗ Гилән Герасимовна темдглҗ багшнрт Хальмг Таңһчин ачта багшин өөдән нер иткүлҗәдг темдгинь болн цаасинь, Хальмг Таңһчин Күндллһнә һашгиг бәрүлҗ өгв. Тер мет тиим өөдән ачлвриг таңһчин Улсин Хуралын (Парламентин) Ахлач Артем Михайлов бәрүлҗ өгәд багшнриг бас йөрәв.
Хальмг Таңһчин залврин Күндллһнә һашгиг багшнрт залврин Ахлачин дарук Этән Алексей бәрүлҗ өгәд йөрәв. Тер мет сурһуль-эрдмин болн номин министр Александр Ким салврин цуг көдләчнриг йөрәҗ ведомственн ачлвриг бәрүлҗ өгв. Хальмг Таңһчин артистнр болн бичкдүдин ансамбльмуд билг-эрдмәрн хургт орлцачнриг байрлулв.

ТҮРВӘН Һуна

Видео