Наадмд орлцхар белдҗәнә

08-10-2026, 12:54 | Общество, Таңһчин зәңгс, Зіњг

Цергә шишлң керг-үүлдврт орлцачнрин болн терүнә йовудт әмнәсн хаһцсн дәәчнрин өрк-бүлмүдин элчнр Адыгея Республикд болх «Әрәсән күүкд улсин зүркн» нертә наадмд орлцхар белдҗәнә. Терүнд Өмн үзгин болн Ар Кавказин дуһргудын 14 региона элчнр орлцхинь күләгдҗәнә.
«Төрскән харсачнр» саңгин Хальмгин әңгин һардач Хаалһин Очрин келсәр, мана таңһчиг дәәчнрин авальмуднь болн әмән өгсн эцкнрин үрднь элчлхмн. Наадмин йовудт Төрскән харсачнрин өрк-бүлмүдин элчнр хоорндан таньлдад, хөөннь өөрхн залһлда бәрҗ күүндҗ чадхмн гив.
Региона элч болһн эврә һазрин сойл, өвәрц авг-бәрц үзүлхмн. Концертин көтлвр үзүлсн деерән регион болһн келн-улсин эдлдг хот, өвкнрин билг-эрдмин зөөрән олна оньгт бас тусхахмн. Чинртә наадм Әрәсән улсин ниицлтин җилд давулгдхнь темдгтә гиҗ заах кергтә. Өдгә цагт мана таңһчин делегац сойлын болн зуульчллһна министерствин, «Мой бизнес» төвин болн «Калмыкия» РИА-н дөңнлтәр чинртә наадмд белдҗәнә.
ОЛЬДАН Цаһан

Видео