Иим нертә ик төсв Хальмг Таңһчд күцәгдҗәнә. Сойлын соньн эн керг-үүлдвр ноха сарин 5-д эклв. Улсин үүдәлтин таңһчин Герин һардач Тачин Җирһлин келсәр, эн төсвин йовудт Элстд, таңһчин райодт концертс, эрдмчнрин кичәлмүд болхмн.
«Дун – улсин седкл» гидг төсв ноха сарин 5-ас авн 14 күртл болхмн. Әрәсән сойлын саң бүрдәҗәдг эн төсв улсин оюни билг-эрдмәр соньмслһиг шинәс сергәх күслтә мөн. Улсин көгҗмин билг-эрдмиг дөңнәд, билгтә улст туслх таал тогтахар төсвин бүрдәһәчнр шунсмн.
Эврә сән дурар үүлддг коллективст, баһ-бичкн селәдәр бәәдг улст эн төсв туслхнь лавта. Нертә артистнрлә хамдан нег тәәз деер билгән үзүлх таал бәәрн улст учрҗана.

«Ик завср» марһана ашлгч девсңд орлцачнр Әрәсән Президент Владимир Путинлә харһв, тедн дунд Хальмг Таңһчин элч, Баһ Дөрвдә гимназин сурһульч Хойна Аделина (зургт) билә.

Москва балһсна Лужники спортын талвңд тосхачин Өдрин 70 җилин өөн өргнәр темдглгдв. Әрәсән тосхлтын халхин цуг элчнриг эн байр хамцулв. Хальмг Таңһчин залврин Ахлачин негдгч дарук Цернә Эрднь, тосхлтын, көлгнә болн хаалһин эдл-ахун министрин үүл дааҗадг Шахана Андрей болн таңһчин ирлцңгү бүрдәцсин мергҗлтнр Хальмгин делегацин ханьд байрин керг-үүлдврт орлцв.

Ноха сарин 8-д Хальмг Таңһчин Толһач Хаска Бату Лаганя районд одад, тенд тосхгдҗадг болн ясгдҗадг бүрдәцсиг бүрткв. Залврин Ахлач Босхмҗин Гилән болн залврин гешүд терүнд бас орлцв.

Давсн амрлһна өдрмүдт Лаганя районд бадм цецгин наадм болв. Җил ирвәс әрүн чинртә бадм цецг һәәххәр Әрәсән регионмудас ирдг зуульчнрин то өсәд йовна. Байрин керг-үүлдврмүд бембә өдрлә өрүн эрт Җалһа селәнд болн Лагань балһснд болв. Галсан хурлд ирсн улсин төлә һәәхүл болн экскурсь бүрдәгдсн билә. Терүнәс нань гиичнр оңһцар йовад, усн дотр болсн экскурсьт орлцв.

Шидр Хальмг Таңһчин залврин Ахлачин дарук – таңһчин то-дигин делгрлтин министр Этән Алексей Приютна района Первомайский селәнә лицейд кегдҗәдг бат ясврин йовудыг бүрткв. Ясврин көдлмш «Баһчуд болн бичкдүд» гидг келн-улсин төсвин «Хамгин сәнь бичкдүдт» гидг таңһчин көтлврин йовудт күцәгдҗәнә. Тер мет таңһчин сурһуль-эрдмин бүрдәцин бат ясвр «Негдсн Әрәсә» партин улсин көтлврин һоллгч зөрүллтсин негнь болна.

Тосхачин Өдр угтад, Целинн районд байрин хург болв. Төрскн района болн төв селәнә тосхлтд орлцсн ветеранмудыг байрин хургт цуглулв (зургт). Района толһач Увшан Басң тосхачнриг сән Өдрлә йөрәһәд, төрскн һазр-уснаннь босхмҗд болн делгрлтд күргсн ач-тусинь темдглв.

Ноха сарин 3-д ТНТ телеүзлд «Коп-звезда» гидг нертә шин сериал олн хәләһәчнрин оньгт тусхагдв. Терүгинь режиссёр Виталий Дудка белдҗ тәвсмн. Фильмд хальмг артистк Көкән Марина (зургт) наадснь темдгтә болв.

Хальмг Таңһчин Толһач Хаска Батун темдглсәр, Төрскән харсчадг баатрмуд дунд Әрәсән кикбоксингин Федерацин элчнр бас бәәнә.

Таңһчин дунд сурһульмудт болн бичкдүдин садмудт бат ясврин көдлмш цаарандан күцәгдҗәнә. Эн җил мана таңһчд 21 сурһуль болн бичкдүдин 6 сад шинрүлгдҗәнә.
- Ясврин көдлмш «Баһчуд болн бичкдүд» гидг келн-улсин төсвин «Хамгин сәнь бичкдүдт» гидг таңһчин көтлврин йовудт күцәгдҗәнә. Тер мет таңһчин сурһуль-эрдмин бүрдәцин бат ясвр «Негдсн Әрәсә» партин улсин көтлврин һоллгч зөрүллтсин негнь мөн. Эн көтлвр Әрәсән гегәрлтин Министерствлә хамдан күцәгдҗәнә.