Мәәдр Гегәнә алтн герлд

Сегодня, 14:13 | Общество, Таңһчин зәңгс, Зіњг, Бурхн-шаҗна төрәр

Лаганя әмтнд амрлһна өдр ончта үүлдвр болсарн тодлгдв. Таңһчин әмтн чигн эн йовдлыг байрин седклтәһәр тосв. Иргчин Бурхна - Мәәдр Гегәнә бумбин өөр олн улс цуглрҗ зальврв. Әрүн чинртә эн бумбиг ясч шинрүлснә хөөн әрвслҗ, үүлдврт оруллһна шаҗна йосрхл энд күцәгдв.
Хальмгин Шаҗн Лам Тензин Чойдакин һардврт Бурхн Багшин Алтн сүмин гелңгүд болн нер туурсн Дрепунг Гоманг хурлын гелңгүд ном умшҗ эн ик мөргүлиг давулв.
Гевш Тензин Чойдакин келсәр, Лаганьд иим хәәртә Бурхн – Мәәдр Гегәнә бумб дүңгәҗәхнь ик чинртә болн амулңта болҗана. Иргчин Бурхна хәәрнд күртнә гисн энтн ик кишгтә болн буйнта йовдл мөн.
«Тадн хөвтә әмтн болҗанат, өдр болһн Мәәдр Гегәндән ирҗ зальврх таал бәәнә. Иргчин Бурхна евәлд бәәһәд, буйнта кергүд күцәҗ, олн-әмтндән туста болснас даву ик хөв уга. Әрүн эн Бурхна евәл цуг әмтнд күртҗ, урмдын болн чидлин булг болҗ, эвин болн төвкнүн бәәдлд туслх болтха» – гиҗ Хальмгин Шаҗн Лам цуглрсн улсиг йөрәв.
Мәәдр Бурхна бумб ясвр кегдҗ, шинрүлгдснә хөөн әмтнд урмд өгч герлтв. Цуг тоотнь шаҗна зокалар кегдәд, зурһан-зүүл әмтнд болн цуг әмтә тоотд туслхнь маһд уга. Кезәңк авъясар ном умшгдҗ, цуглрсн әмтн иргчин Бурхндан зальврҗ, күндллһән медүлв.
Әрүн чинртә Бурхна бумб цеврдҗ, цуг улсин седкл-ухан төвкнҗ батрхд, иргчдән иткҗ үүлдхд туслтха гиҗ гелңгүд болн цуглрсн улс зальврҗ мөргв.
ОМ МОХИ МОХИ МАХА МОХИ СВАХА
ХӨӨЧИН Галина

Видео