Таңһчин улс диктант бичв

Сегодня, 13:06 | Общество, Таңһчин зәңгс, Зіњг

Мана орн-нутгин олн-әмтн 2026 җилин этнографин ик диктантын керг-үүлдврт орлцҗана. Әрәсән келн-улсин сойлын болн авъясмудын төрмүдт эн нерәдгдҗәнә. Гегән-герлин керг-үүлдвр Әрәсәд 2016 җиләс авн бүрдәгдҗәнә, тер җил терүнд 90 миңһн күн орлцв. Эн седвәриг түрүн болҗ Удмуртин әмтн татсн бәәҗ. Орс келәр болдг диктантла зерглҗ этнографин туск медрлиг эдн өөдлүлхәр седв. Цаг ирвәс энүнд орлцдг әмтнә то өсәд йовна, нам талдан орн-нутгудын элчнр чигн медрлән сөрхәр седнә.
Әрәсәд бәәдг хойр зун шаху келн-улс төрскн тууҗан, сойлан, авъясан улм сәәнәр медҗ автха гисн күцлтәһәр диктант давулгдҗана. Тиим кевәр бидн Әрәсән келн-улсиг хамцулҗ, тедн хоорнд эвин, ах-дүүһин, үр-иньглгч сән авъясиг тархахвидн гиҗ эн олна керг-үүлдврин бүрдәһәчнр тоолҗана.
«Диктант 30 сурврас тогтна, терүнд хәрү өгхин төлә 45 минут өггднә, эн җил энүг үкр сарин 3-ас авн 12 күртл бичх. Мана орлцачнр цугтан сурврмудт чик хәрү өгхәр белн бәәнә, теднә төлә бидн Б.Б.Городовиковин нертә таңһчин Баһчудын герт цуг таал тогталавидн. Сурврмуд цергә шишлң керг-үүлдврин ветеранмудас, сойлын үүлдәчнрәс ирәд бәәв. Йирин улсас нань Мөшклһнә комитетин көдләчнр, зарһин приставмуд болн нань чигн бүрдәцсин элчнр, баһчуд, келн-улсин бүрдәцсин ахлачнр ирв»,- гиҗ эн керг-үүлдвриг һардҗадг Дорҗин Санл цәәлһвр өгв.
Энд болсн диктантыг 100 һар күн бичв, кесгнь эврә келн-улсин хувц өмсәд кеерәд ирҗ. Диктантын хөөн орлцачнр эврә төрскн келәр ду дуулҗ, спортын керг-үүлдврт орлцҗ, цаган сергмҗтәһәр давулв.
- Эн керг-үүлдвр улсин ниицлтин Өдрт нерәдгдсн деерән мана таңһчин келн-улсин хамцуллһнд чигн туслҗана. Бидн цугтан ниитә бәәнәвидн, мана таңһчин келн-улсин хоорндк тогтурта бәәдл цааранднь өргҗәд бәәтхә»,-гиҗ чечен улсин сойлын төвин һардач Умар Макаев тоолврарн хувалцв.
Тер мет эн өдр Амр-Санана нертә Келн-улсин дегтрин саңд элстихн бас диктант бичв. Хальмг келән болн сойлан бас сәәнәр медх кергтә гиҗ эдн келв. Тер мет Хальмг Таңһчин Толһач Хаска Бату диктантын туск тоолврарн хувалцв. Эн керг-үүлдврт орлцад эврә медрлән сөрҗ болхмн. Әрәсән келн-улсин сойлыг болн тууҗиг улм сәәнәр медх седкл үүднә.
Давсн арвн җилин туршарт нарт-делкән гегән-герлин эн ик төсвд хүврәд, Әрәсән келн-улсин сойлын зөөриг күндллһнә ик чинртә темдг болв. Үкр сарин 5-д Н. Н. Пальмовин нертә Келн-улсин музейин талвңд болх бас нег диктантд таңһчин улс олар орлцв. Тиим седвәр мана тууҗин туск медрл сергәҗ, төрскн келән дасх күслтәһәр үйнрин хоорндк залһлдаг батрулна, гиҗ Бату Сергеевич ашлв.
ТҮРВӘН Һуна

Видео