Үүдәгч үүлдврин хаалһд учрсн соньн харһлтс

Сегодня, 09:57 | Общество, Таңһчин зәңгс, Зіњг, Сойл

Эн халун зуни цаг «Өөрднр» бииһин театрт мартгдшго олн харһлтсарн тодлгдв. Тывад болсн шаҗна үүлдәчнрин IV нарт-делкән хургт нер туурсн мана коллектив орлцв. Делкәд нер һарсн шаҗна үүлдәчнр, номтнр, олна болн сойлын үүлдәчнр цуглрҗ ирсн ик хургиг сексн өргмҗтә сәәхн нәәриг белдлһнд Тыван нертә үүлдәчнрлә хамдан Хальмгин бииһин театрин балетмейстер Нәдвдә Владимир шунмһа кевәр орлцсмн.

Эн җилә үүдәгч үүлдврән тиигҗ өргмҗтәһәр Хальмгин бииһин театр эклсмн. Цагиг болн үйнриг залһсн эн үүлдврт орлцсн йовдл «Өөрднр» бииһин театрин артистнрт билгән улм ясрулх сән дамшлт хоршав.
Үүдәгч халхин медрлән гүүдүлсн Хальмгин бииһин театрин артистнр цааранднь Уулын Алтад һарч йовсмн.
Иньгллтин концерт.
Алтан Республикин Усть-Коксинск районд седкл үүмүлгч соньн нег харһлт болв. Нер туурсн хойр коллектив: Хальмг Таңһчин «Өөрднр» бииһин театр болн Уулын Алтан «Алтам» дууна болн бииһин театр нег тәәз деер харһв.
Эн хойр коллективин концертд орлцсн әмтн йосндан байрта бәәв. Иим концерт болхинь соңссн улс Алтан райодас, селәдәс ниргәд цуглрҗ ирв. Хол һазриг мөрн өөрдхнә гиҗ кезәнә келдг бәәсмн. Ода болхла һазрин ик холд нег-негнәсн ууҗмд бәәдг хойр нутгиг ду-би, билг-эрдм негдүлв. Алтан хамгин хол муниципальн бүрдәцсин әмтн толһачнртаһан эн концертд ирснь цугтад, нег үлү артистнрт ик бахмҗта болв.
Артистнриг әмтн альх ташҗ тосчав. Эднә ду-би болһниг әмтн зогслго альхан ташад артистнрин билгиг үнлҗәхнь ик байрта билә.
Кайчи Мерген Тельденовин дуулсн дуд концертин йоста кеермҗ болсна тускар «Өөрднр» театрин артистнр өврҗ келнә. Әвртә сәәхн дунь кезәңк көгҗмин айсла нииләд, Алтан өндр уулмудын күчинь, энд бәәдг әмтнә гиичлүлгч өргн седклинь медүлсн болҗ күңкнсмн.
Уулта һазрин сәәхн йиртмҗин бәәдл хальмг артистнрт йир икәр таасгдв. Өндр уулмудын ораднь, эң-зах уга көк теңгр, цевр аһар өвәрц сәәхн һәәхмҗ болҗ тодлгдхнь лавта болв.
Ах-дү келн-әмтнә сойлла өөрхнәр таньлдад, дууна болн бииһин «Алтам» коллективлә хамдан йовад, концертс бүрдәсн йовдл ик урмдта болв. Алтан әмтн Хальмгин билг-эрдмиг өөдәнәр үнлснь ик байрта болв.
Мартгдшго иим йовдл бүрдәсн «Алтам» коллективд, Айана Ивановна Шинжинад болн Байрам Вячеславович Курдяповд «Өөрднр» театрин артистнр болн һардвр ханлтан медүлҗәнә. «Сойлын нөкцлт» гисн дуудвртаһар болсн эн үүдәгч үүлдвр Әрәсән келн-улсин ниицлтин җилд болснь нег үлү ончта болҗана.
Хальмгин авъясмуд гисн энтн мел тууҗин йовдл гиҗ санхмн биш. «Өөрднр» бииһин театр авъясмудыг маднд сән кевәр үзүлнә. Кезәнә мана өвкнр өмсч йовсн хувцна кев-янзинь хадһлҗ тәәз деер һарчадг баһчуд бииһәр дамҗад авъясмудыг медүлнә. Кен ахан күндлдг, эңкр ээҗән килмҗ һарһҗ тевчдг болн нань чигн тоот улсин бәәдл-җирһләс авгдсмн. Тәәз деер үзүлгдсн би тегәд өсч йовдг үйнрт улсин авъясмудын сурһмҗ өгнә.
Келхд, һаха сарин 25-д «Өөрднр» бииһин театр Хальмгин хәләһәчнртән билг-эрдмән үзүлҗәнә.

Хальмг хувц белдсн Жозефина буль.
Шидр «Өөрднр» театрин коллективд соньн харһлт болв. Тәәз деер өмсдг хувц белдлһәр нер һарсн модельер Жозефина Буль «Өөрднрин» кесг үүдәврин төлә хувцна янзинь белдҗ өгсн болдг. Олн җилин туршарт билгтә модельер Жозефина Буль Нәдвдә Петрла үүдәгч залһлда бәрҗ, ирлцңгү хувц-хунриг диглҗ зурҗ белдҗәсмн. Нертә эн күүкд күүнә ач күүкнь шидр театрт ирҗ, ээҗиннь зургудыг белглв. Алевтина авч ирсн зургудт - Нәдвдә Петрин көгҗмин үүдәврмүдт Жозефина Буль белдсн зурцс болҗана. Хальмгин Баатр Нәдвдә Петр зурач болн модельер Жозефина Бульла таньлдад, олн җил хамцу үүлдәд кесг өвәрц хувц белдҗ тәәз деер һарһсн болдг.
Хальмг улсин хувцин өвәрцинь хадһлҗ, тәәз деер һарһҗ үзүлсн ач-тусинь темдгләд, 1978 җилд Жозефина Буль Хальмг Таңһчин сойлын ачта көдләч болв.
Хальмг сойлын делгрлтд күргсн ачинь темдгләд Жозефина Михайловна Бульд 1997 җилд «Хальмг Таңһчин күндтә иргн» гидг ачта нерн зүүлһгдсмн. Театрин артистнр энүнә ач күүкн Алевтинад ханлтан медүлҗ, күндлҗ тевчв.
Әрәсән өврмҗтә һазрар.
Дорд үзгин һазрт күрәд, хальмг улсин билг-эрдм үзүлснә дару «Өөрднр» театр дарани йовлһндан белдв.
Эн саамд нер туурсн коллективин артистнр Әрәсән өврмҗтә бәәрнд зуульчлад, һаха сарин 28-әс авн хулһн сарин 12 күртл Нижегородск, Владимирск, Ивановск, Тверск мүҗсин балһсдар йовҗ, концертс үзүлхмн. Дзержинск, Арзамас, Муром, Владимир, Шуя, Ржев болн Кострома балһсдын әмтн хальмг келн-улсин билг-эрдмлә таньлдхмн.
«Өөрднр» бииһин театрин концертс «Бидн – Әрәсә» гидг шаңһа ик төсвин йовудт давҗана, - гиҗ бииһин театрин балетмейстер Нәдвдә Владимир келнә. - Мана театр кесг һазрт күрч, хальмг улсин билг-эрдмән үзүлсмн. Орн-нутгин зуульчллһна хамгин өвәрц хаалһар йовҗ, хальмг бииһин эрдмән олн хәләһәчнрт нерәдхвидн».
ХӨӨЧИН Галина

Видео