«Бамб цецг» – Әрәсән балһсдт

Сегодня, 14:12 | Общество, Таңһчин зәңгс, Зіњг, Сойл

«Бамб цецг» дууна болн бииһин ансамбль Әрәсән балһсдар гастрольд йовҗана. Хальмгин ансамбль 11 балһснд билг-эрдмән үзүлхмн. Һаха сарин 16-ас авн 28 күртл коллектив үүдәгч хаалһд йовхмн. Эн олн балһсдын хәләһәчнр хальмг ду-биилә таньлдҗ, ансамблин белдсн шин үүдәврмүдиг чигн үзхмн.
Ансамблин һардач, Хальмг Таңһчин билг-эрдмин ачта үүлдәч Катан Саврин келсәр, эднә коллектив «Бидн – Әрәсә» гидг шаңһа ик төсвин йовудт зуульчллһан эклв. Тавн җилин туршарт келн-улсин үүдәгч коллективс Әрәсән регионмудын әмтиг келн-улсин сойлла таньлдулҗана. «Бамб цецг» урдк җилмүдт чигн эн төсвин йовудт Кавказин, Төв Әрәсән, Иҗлин көвән һазрар йовҗ концертсән үзүлсн билә.
Эн җил «Бамб цецгин» хаалһс Иҗлин деедк көвән һазрар давхин тускар ансамблин ах балетмейстер, Хальмг Таңһчин ачта артист Бамбарыка Владимир келв. Чувашин болн Татарстана хәләһәчнрт ансамбль хальмг ду-бииһән нерәдхмн.
Чебоксары балһснас экләд, мана ансамблин артистнр Йошкар-Ола болн Волжский балһсдт билг-эрдмән үзүлхмн. Цааранднь Татарстана кесг балһсдт хальмг коллективин концертс болхмн.
Концертсин көтлврин тускар Бамбарыка Владимир тодрхаһар келҗ өгв. Олн хәләһәчнр меддг ду-биилә зерглҗ әмтнд шин үүдәврмүд үзүлгдх болв. Концерт болһн «Цам» гидг шаҗна йосрхл сергәҗ эклнә. Хальмгин өвәрц сойлла талдан келн-улсиг таньлдулна. Хальмг Таңһчин тускар әмтн олар медҗ,мана таңһчд ирх седкл зүүтхә, гиҗ көтлврән белдвидн, - гиҗ ах балетмейстер келнә.
Концертин көтлврт көгҗмин халхнь баһ биш орм эзлнә. Көгҗмчнр болн дуучнр билг-эрдмән бас үзүлхмн. Энүнә тускар Хальмг Таңһчин ачта артист Шавкана Баир келҗ өгв.
«Бамб цецг» ансамбль цааранднь эврә зурала ирлцҗ, гастрольд йовхин тускар Савр Вячеславович келв. Оренбург, Стерлитамак, Уфа болн Самара балһсдт концертс болх гиҗ күләгдҗәнә. Келхәс, Оренбургд болн Уфад мана ансамбль кесгәс нааран одад уга. Арвн негн хонгин туршарт арвн негн балһснд күрч, хальмг ансамбль бәәрн әмтнд сергмҗ үүдәхмн. Хальмгуд бәәдг балһсдт билгән үзүлснь ик чинртә болдгинь Катан Савр темдглнә.Келхд, Оренбургд баһ биш хальмгуд бәәнә. Зәңг соңсад, тедн концертд ирхнь маһд уга. Йошкар-Ола балһсна әмтн чигн хальмг ду-биид бас дурта.
Келхәс, энд тер кемд «Танцуй и пой, моя Россия» гидг наадм давхмн. Терүнд Хальмгин «Бамб цецг» бас орлцхмн.
Эн йовлһндан «Бамб цецгин» артистнр талдан коллективслә хамдан ни-негн нааднд орлцхмн. Бәәрн коллективлә дуулҗ-биилҗ, концертиг ашлдг сән авъяс бас батрҗана.
Урднь болхла, «Бамб цецг» Махачкалад концертән үзүләд, тер һазра хәләһәчнриг соньмсулснь лавта.
ҖИРҺЛИН Кермн

Видео