Суңһврин йовудын тускар күүндв

Сегодня, 11:06 | Общество, Таңһчин зәңгс, Зіњг

Һаха сарин 21-д Хальмг Таңһчин Олна палатын һардвр болн шинҗләчнр 2026 җилин суңһврин ашин тускар седкүлчнрт келҗ өгв. Сүүриг таңһчин Олна палатын ахлач Мучан Батыр нүр үгәр эклҗ, таңһчин олнд зәңгллһнә эв-арһсин көдләчнрт ханлтан өргв. «Эдн суңһврин йовудт мана үүлдврин тускар өргнәр зәңглҗәлә. Тер мет «Ростелеком» компаня көдләчнр маднд кергтә кергсл һарһҗ өгәд, Элстин болн райодын суңһврин әңгүдт тасрхан уга бүртклһ келһнә төлә сән таал бүрдәв, эн нөкцлт маднд туста болв», - гиҗ эн темдглв.

Тер мет Батыр Иванович таңһчин профсоюзмудын болн терүнә һардач Александр Шеметовин ач-тусинь бас темдглсн болдг, хойр җил дарандан таңһчин Олна палатд болн суңһвр бүрткдг терүнә штабин төлә ик бәәр һарһҗ өгсн мөн. Штабин гешүд болн шинҗләчнр райодын, Элстин суңһврин әңгүдт суңһврин көдлмш яһҗ давҗахин тускар соңсхвр кев. Шишлң сурһульд медрл авсн штабин бүрткәчнр суңһврин кемд дөң болҗ, цәәлһвр өгч үүлдв.
Тиигәд таңһчин цуг әңгүдин комиссьмүд дигтә-даратаһар көдлҗ көдлмшән бүрдәмҗтәһәр күцәв, гиҗ таңһчин Олна палатын ахлач ашлв.
Цааранднь Олна палатын шинҗләчнр тоолврарн хувалцв. «Октябрь» кинотеатрт бәәршлсн суңһврин комиссь даавртаһар суңһврт белдҗ, цугнь дигтә-дараһар күцәгдсиг шинҗләч Селән Цаһан иткүлв.
Һурвн өдртән штабин талвңд партьсин элчнрлә болн баһчудла харһад, семинармуд давулҗ, суңһврин тускар цәәлһвр өгләвидн. Цаг давад, оютнр болн баһчуд шунлтта иргнмүд болҗ олна бәәдл-җирһлд чигн орлцад бәәх», - гиҗ шинҗләч Эрднин Анатолий келв.
Тер мет эн күүндврт орлцсн шинҗләчнр Манҗин Элеонора, Секенә Юрий болн Александр Шеметов суңһвр белдлһнә көдлмшиг өөдәнәр үнлв.
Харһлтын чилгчәр Мучан Батыр нарт-делкән бүрткәчнрин тускар бас келв. Эднә ик делегац мана таңһчд ирв, орн-нутгудтнь видеобүртклһнә эв-арһ олзлгдхш, тегәд тиим дамшлт эдниг икәр соньмсулв. Тер мет тиим бүртклһнә видеозурц суңһврин хөөн чигн хадһлгдна, терүг олзлад, суңһврин диг-дараг улм тодрхалулҗ, оньгтан эс авсн тоотыг йилһҗ авч болҗана гисн цәәлһвр гиичнриг өврүлв, гиҗ Олна палатын ахлач товчлв.
ТҮРВӘН Һуна

Видео