Н.Пальмовин нертә Келн-улсин музейд Ар Кавказин зурачнрин һәәхүл давсн долан хонгин өдр секгдв. Хулһн сарин 22 күртл һәәхүлд тәвгдсн үүдәврмүдлә таньлдҗ болхмн. Дорд үзгин музейин Ар Кавказин әңгин көрңд бәәдг зурачнрин үүдәврмүд эн һәәхүлд үзүлгдҗәнә. Ут тоодан 58 үүдәвр энд олн хәләһәчнрин оньгт тәвгдсн бәәнә. Живописин, скульптурин, графикин болн урн һарин дүрслүлгч эрдмин янзар зургдсн, кевлгдсн олн зүсн үүдәврмүдлә олн-әмтн соньмсч таньлдҗана.
Музейин көдләчнрин цәәлһсәр, эн һәәхүл Ар Кавказин болн Әрәсән Өмн үзгин зурачнрин өдгә цага үүдәврмүдлә хәләһәчнриг таньлдулҗана.

«Улан Залата» гидг нертә байрин ик нәр Элстд болв. Келн-улсин дегтрин саңд эн байрин үүлдвр күцәгдв. Таңһчин әмтн болн олн гиичнр эн керг-үүлдврт орлцв. Хальмг улсин тууҗар, сойлар, авъясмудар соньмсчадг әмтнд эннь йир соньн болв. Үүдәгч үүлдврән делгрүлхин төлә, энд кесг талвң үүлдсн билә.

Октябрьск районд тутрһ хуралһна кем давҗана. Тодлхас, нидн Әрәсән селәнә эдл-ахун Министерствлә бооца батлсна ашт тутрһин тәрәнә һазрин аһу икдв. Тер мет шаңһа дем күргснә йовудт услврин усна үннь даңцагддг болв. Эн керг-үүлдвриг таңһчин Толһач Хаска Батун онц кевәр бүрткнә.

Маңһдур, һаха сарин 27-д, сурһмҗлачин Өдр мана таңһчд болн цуг орн-нутгт темдглх. Яһад гихлә ода дошкольн сурһуль-эрдмин җил болҗана. Сурһмҗлачнр бичкдүдиг умшдг, бичдг дасхна, эднә билг-эрдминь делгрүдҗ теднд төрскнч сурһмҗ өгнә. Тегәд сурһмҗлачин болн бичкдүдиг асрдг бүрдәцин чинрнь цаг ирвәс өсәд йовна.

Хальмг Таңһчин сурһульмудт болн бичкдүдин садмудт бат ясвр күцәгдҗәнә. Үстин района Эрднихнә дунд сурһулин көвүд-күүкд болн багшнр таньгдшгоһар хүврсн, шинрүлгдсн, йоста бәәшң болсн сурһулин гертән шин җилән эклв. Района һардач Очра Геннадий ясврин йовудыг бүрткв, сурһульчнрин эк-эцкнр болн багшнр бас нөкд болв.

Урҗ өдр Санкт-Петербург балһснд сойлын XII нарт-делкән ик хург эклв. Хальмг Таңһчин сойлын болн зуульчллһна министр Бембин Евгений болн театрин үүлдәчнрин хүүвин әңгин ахлач Владимир Стаценко терүнд орлцҗана.

Хальмг улсин шүлгч Сән-Белгин Хаср һаха сарин 25-д һарсн өдрән темдглдг билә. Ууһн бичәчнрин негнь Хаср Бикинович Баһ Цоохра нутгин Булмукта селәнд 1909 җилд һарсмн. Өдгә цагт эннь Үстин района Барун селән болҗана. Хасрин эцкнь билгтә күн бәәсмн. Олн тууль-түүк меддг, чееҗәр келдг эн келмрчиг әмтн эврә селәндән бәәтхә талдан олн һазрар чигн сәәнәр меддг бәәсмн. Эцкин билгәс нанд күртҗ, – гиҗ Хаср бийнь келдг билә.

Эн җил мана орн-нутгт олн улсин ниицлтин җил зарлгдсмн. Ик кезәнәс авн Әрәсәд олн келн-улсин элчнр хоорндан ахнр-дүүһинәр ниитәһәр бәәнә. Тодлхд, 2025 җилин чилгчәр келн-улсин хоорндк хәрлцәнә Хүүвин селвлцәнә йовудт татсн седвәриг Әрәсән Президент Владимир Путин дөңнәд, ирлцңгү зәрлг батлсн болдг. Келн-улс болһн эврә байн тууҗта, соньн авг-бәрцтә, өвәрц сойлан олн дунд тархаҗ йовна. Эврәннь төрскн келәр дууһан дуулад, келн-улсин бииһән бииләд, олна оньг авлна.

Урд цагт арат, керә, чон һурвн нәәҗлдҗ, ах-дү болад бәәҗ. Тиигәд бәәҗәһәд, арат хот-хол хәәһәд гүүҗ йовад, хавхд торна. Дүнь, керә, эгчән торсинь медчкәд, нисч ирнә.

Теңгрт улан нарн өөдмин цааһас һарч ирәд, эврәннь алтн герлән делгү цацв – һазриг серүлв.
Түрүн герл һазрур нисәд, торһад тусв. Торһа шовун серәд, үүрәсн нисч һарад, теңгрүр өөдләд, эврәннь цеңнсн цаһан мөңгн дууһан дуулв: «Өрүни цевр аһарт ямаран сәәхн! Йир сәәхн! Ямаран у!»