Ар Кавказин зурачнрин үүдәврмүд

Сегодня, 12:28 | Общество, Таңһчин зәңгс, Зіњг, Сойл

Н.Пальмовин нертә Келн-улсин музейд Ар Кавказин зурачнрин һәәхүл давсн долан хонгин өдр секгдв. Хулһн сарин 22 күртл һәәхүлд тәвгдсн үүдәврмүдлә таньлдҗ болхмн. Дорд үзгин музейин Ар Кавказин әңгин көрңд бәәдг зурачнрин үүдәврмүд эн һәәхүлд үзүлгдҗәнә. Ут тоодан 58 үүдәвр энд олн хәләһәчнрин оньгт тәвгдсн бәәнә. Живописин, скульптурин, графикин болн урн һарин дүрслүлгч эрдмин янзар зургдсн, кевлгдсн олн зүсн үүдәврмүдлә олн-әмтн соньмсч таньлдҗана.
Музейин көдләчнрин цәәлһсәр, эн һәәхүл Ар Кавказин болн Әрәсән Өмн үзгин зурачнрин өдгә цага үүдәврмүдлә хәләһәчнриг таньлдулҗана.
Эн һәәхүлд үзүлгдҗәдг зургуд түрүн болҗ Москвад 2015 җилд Дорд үзгин шаңһа музейд хәләһәчнрин оньгт тусхагдсн билә. Адыгейд эн музейин әңг секгдсн цагас авн 30 җил болҗах өөнлә ирлцүлҗ тиигхд һәәхүл секгдсн билә. Москван хөөн эн һәәхүллә Краснодар, Черкесск, Грозный, Махачкала, Нальчик, Әәдрхн, Карабулак, Владикавказ балһсдын хәләһәчнр таньлдсмн.
Тиигәд хам-хоша бәәдг һазрин музеймүдәр нүүһәд йовҗ, соньн эн һәәхүл Әрәсән улсин Ниицлтин җиллә Хальмг Таңһчд ирв. Эн йовдл иигәд харһад ирснь йирин йовдл биш, энүнә чинрнь йир ик балһсдын Әрәсән олн келн-улс хоорндк залһлданд завср угаг хоша бәәдг улсин нөкцлт цуг халхар делгрҗәхиг, тер дотр сойлын залһлдан шин олн керг-үүлдврмүдәр немгдәд йовхинь үзүлҗәнә.
Эн өдрмүдт көдлмшән эклсн һәәхүл Адыгейин, Дагестана, Кабардино-Балкарин, Карачаево-Черкессин, Чечнян болн нань чигн регионмудын зурачнрин үүдәврмүдлә таньлдх арһ өгчәнә.
Эврә һазр-усан болн нег һазра улсан билгтә кевәр үзүлҗәдг нертә зурачнр Теучеж Кат, Феликс Петуваш, Махмуд Тугуз, Мухадин Кишев, Герман Паштов, Хамид Савкуев, Умар Мижев, Аманди Асуханов, Николай Вдовкин, Виктор Андросов, Петр Горбань, Валерий Блохин, Рудольф Паранюшкин, Николай Дудченко эн һәәхүлд үүдәврмүдән үзүлҗәнә. Хальмг Таңһчин нерн деерәс зурач Иван Чмерев үүдәврмүдтәһән һәәхүлд орлцҗана.
Келхәс, энд үүдәврмүдән олна оньгт тусхаҗадг зурачнр Әрәсәд бәәтхә, делкәд темдгтә зурачнр болҗана. Чинртә кесг мөрәсин лауреатнр эврә һазртан күндтә болсн деерән төрскн нутган цуг Әрәсәд нер туурулсн билгтнрин һәәхүлд әмтн зургудлань таньлдҗана. Өдгә цагиг улсиннь авъясмудла ниицүлҗ, зурачнр эндрк өдриг үзүлсинь хәләһәчнр темдглҗәнә. Талдан һазрин йиртмҗ ямаран сәәхн болҗахинь зургудыг эргҗ хәләһәд ирсн әмтн медҗ авв. Зурачнрин билгтә зургудын дөңгәр хәләһәчнр хоша бәәдг һазрар зуульчлсн болв. Билг-эрдмин күчн тиим болҗана.
Урн һарин кегдлмүд болхла улс болһна билг-эрдм өвкнрин зөөрәс улан авч, мана цаг күртл ирҗ, шин янзар кеерч, әмтнә нүд байрлулҗ йовна.
Нег ик орн-нутгт бәәдг олн келн-улсиг сойл негдүләд, келн-улс болһна өвәрц билг-эрдмиг олнд медүләд, цуг әмтн ни-негн седкләр – эвин бәәдлд үрдән өскҗ, ни-эвәр хамцу бәәдг седклиг һәәхүлд тәвгдсн зургуд болн үүдәврмүд медүлҗәнә.
ҖИРҺЛИН Кермн

Видео