Эцкиннь үлгүрәр мал асрҗана

Намрин сүл сарин дундурар мана таңһчин малчнрин төлә үвлзлһнә дааврта кем эклнә. Энүг сән аштаһар давулхар таңһчин фермермүд малын хот эртәснь белдв. Эдн малын хаша-хаацан ясад, тосн-түләһән зөөҗ орулв.
Хальмгин селәнә эдл-ахун министерствин зәңглсәр, эн җилд таңһчин эдл-ахуст асргдҗадг 300 миңһн һар бод мал, 1,5 миңһн шаху хөн үвлзлх зөвтә. Цуг эдл-ахуст малын хот белн бәәнә. Эн җилин намр зөвәр дулан болад, мал өдртән теегт идшләд йовсн учрар малын хот әрвлгдв. Ветеринарн халхар болхла ирлцңгү керг-үүлдврмүд бас күцәгдв.
Таңһчин райодт үвлзлһнә кемд яһҗ белдсинь медхәр шидр Яшкулин района Улан Эрг селәнд эврә эдл-ахудан көдлҗәдг баахн малч Давид Таскировин хошт одад күүндвидн.
Энүнә хошт хөд, мөрд, тер мет такас болн немш такас асргдҗана. Урднь эцкнь Эдуард Андреевич олн җилдән мал өсклһнә халхар көдлҗ йовла. Давид бичкнәсн авн амр биш кергиг үзҗ, медҗ, кергтә тоотыг шиңгәҗ авсмн. Арвн хойртаһасн малын ард йовад цугинь дасч авв. Эндр болхла Давид Таскиров хөрн негтә баахн малч болна. Үвлзлһнә кем һару угаһар давулхин төлә шүрүн хот, тер тоод кесг тонн өвс болн салм эн белдв. Шовудт болхла буудя зөөҗ орулв. Ветеринарн керг-үүлдврмүд бас цаг-болзгтнь күцәгдв. Тер мет хоштнь эврә көлгн бәәнә.
Хам-хоша бәәдг Чилгр селәнәс цевр ус зөөҗ авна. Эндр малчд авһнь Герман Андреевич нөкд болҗана. Фермерин көдлмш өрүн эрт экләд, асхн ора чилдгнь нуувч биш. Мал өсксн деерән Давид буудя, темс, тарвс бас тәрнә, эн җил му биш урһц хураҗ авсинь темдглх кергтә.
Җил болһн малчнр олн зүсн көтлврмүдт орлцҗ, шаңһас мөрә авна, эннь кергән делгрүллһнд эрк биш тусан күргнә. Кесг җил хооран Давид Таскиров шаңһа дем авад, мал хулдҗ авад, кергән делгрүлв. Энүнә келсәр, ирлцңгү эв-арһс сән дөң болв. Тер мет Хальмг Таңһчин Толһач Хаска Бату селәнә эдл-ахун көдләчнрин төрмүдт онц оньган тусхаҗ цуг халхарнь дөңннә, гиҗ бас темдглхмн.
Ямр чигн кергиг даавртаһар, арднь орҗ күцәх кергтә, гиҗ Эдуард Андреевич көвүндән заадмн. Мал асрна гисн амр көдлмш биш. Үвлзлһнә, төл авлһна, кирһлһнә кем цугнь дааврта болна.
Улан Эрг селәнәс арвн долан дуунад бәәдг Таскировин хошт асргдҗадг мал сән чинәтә һару угаһар үвлзх, гиҗ малч нәәлҗәнә.
Давид Таскиров хошт бәәдг гертән балһснд мет сән таал тогтав. Үвлд икәр эс киитрхлә, хавртан сән төл авхар зуралҗанавидн, гиҗ малч келнә. Тегәд Давид Таскиров эцкиннь үлгүрәр малан өскәд, олн-әмтнд үлгүр болад, иргчдән мана таңһчин нүүрлгч эдл-ахусин тоод орхнь чигн лавта гиҗ сангдна.
Өцклдүр болхла Элстд селәнә эдл-ахун көдләчнрин сән Өдрт нерәдгдсн байрин хург болв. Энүнә тускар даруһас зәңглхвидн.
КАРСАНА Евгения



















Республиканская газета, издающаяся на калмыцком и русском языках. Газета освещает общественно-политические события, происходящие в Калмыкии, а также публикует материалы по культуре и языку калмыков.