Таңһчин хазна төсв хәләгдв

Шидр Хальмг Таңһчин Улсин Хуралын (Парламентин) дарани сессь болв. Әрәсән Федерацин сенатор Хачира Борис, ЮФО-д Әрәсән Президентин күцц зөвтә элчллтин Хальмг Таңһчд үүлддг ах инспектор Александр Беляев, таңһчин залврин Ахлач Босхмҗин Гилән, таңһчин Улсин Хуралд Хальмг Таңһчин Толһачин элч Манҗин Араш, зөв-йос харлһна, зарһин болн бүртклһнә бүрдәцсин элчнр сессин көдлмшт орлцв. Таңһчин Улсин Хуралын Ахлач Артем Михайлов сүүриг һардҗ давулв. Эн сүүрт ут тоодан 25 төр хәләгдв.
Эн җилин болн иргч һурвн җилин таңһчин хазна туск закана төсвин төр һоллгчнь болв. Хальмг Таңһчин залврин Ахлачин негдгч дарук – таңһчин финансин министр Шурһчин Очр эн төрмүдәр соңсхвр кев. Түрүләд депутатнр эн җилин хазна туск заканд сольвр оруллһна төр хәләв. Дааврта һардачин темдглсәр, эн җил таңһчин хазна оруһин әңг болхла 35,2 җува болн һаруһин әңгнь болхла 35,6 җува арслң тогтав. Орн-нутгин хазнас йилһгдсн, алвна болн алвна биш мөңгиг учртан авч сольвр орулгдв. Тер мет өгъәлҗ авсн мөңгнә өр даңцалһна диг-даран хооран саагдсн учрар эн җилә хазна һаруһин әңг сольгдв. Ирх һурвн җилин хазна туск закана төсвин төрәр келхләрн, авъяст тохрсар таңһчин хазна өрәлнь социальн чинртә төрмүд хаһллһнд, келн-улсин төсвсин керг-үүлдврмүд күцәлһнд һарһгдҗана гиҗ Шурһчин Очр темдглв. Тиигәд, 2027 җилин эклцәс авн мана орн-нутгт җалвин баһ гисн кемҗән өөдлҗәхәс иштә әмтнә җалв икдүллһнд, бичкдүдиг асрҗадг өрк-бүлмүдт дем өглһнд баһ биш мөңгн йилһгдхмн гиҗ зуралгдҗана. Ирх җилд таңһчин хазна оруһин әңг 34,3 җува болн һаруһин әңг 34,8 җува арслң тогтахмн. Мана таңһчд келн-улсин 8 төсв күцәгдхмн, терүнә йовудт эрүл-менд харлһна болн сурһулин бүрдәцст бат ясвр кегдхмн, хотл балһсна Шапшукован нертә уульнцд шин сурһуль тосхгдхмн, зуульчллһ делгрүллһнә керг-үүлдврмүд бас цааранднь зуралгдҗана. Балһсна сән кец-таал тогталһна, нурҗадг гермүдәс әмтиг нүүлһҗ авлһна төрмүд күцәлһнд бас баһ биш мөңгн йилһгдхиг министр зәңглв. Депутатнр хәләгдсн төрәр цәәлһвр авсна хөөн закана төсвиг түрүн умшлһнднь батлв.
Эрк биш медицинск даатхлһна саңгин таңһчд үүлддг әңгин хазна туск закан бас түрүн умшлһндан батлгдв. Саңгин оруһин болн һаруһин әңгүднь әдл болхмн, 6,33 җува арслң тогтахмн гиҗ таңһд үүлддг әңгин һардач Ванькан Гилән цәәлһвр өгв. Таңһчд промышленн болн эд-бод кедг үүлдврин бүрдәцсин төлә экономикин халхар онц таал тогталһна, арһлачнр көлгн-күчнә, олз-оруһин алв өглһнә туск закад бас батлгдв. Депутатнр административн дааврин, юридическ дөң өңгәр күрглһнә, эзн уга малын, ЖКХ-н болн нань чигн закадын төсвс хәләҗ, ухан-тоолврарн хувалцв. Таңһчд бичкдүдин зөв харслһна төрәр үүлддг күцц зөвтә элч Чужан Наталья бичкдүдиг харслһна саңгин әңг бүрдәгдҗәхин тускар зәңглв, терүг бийнь һардхмн. Ода деерән ирлцңгү бәрмт цаасд белдгдҗәдг болв.
Эн сүүрт зака үүдәгч Хургин әңгүд шинрүлгдв. Хальмг Таңһчин Улсин Хуралын (Парламентин) Ахлач Артем Михайлов Ванькан Гиләнд депутатын иткл цаас болн темдг бәрүлҗ өгв. Гилән Вадимовна «Шин улс» партин әңгиг һардад, өрк-бүлин, эрүл-менд харлһна, күч-көлснә болн социальн политикин әңгин гешүн болв. Тер мет эн промышленностин, тосхлтын, ЖКХ-н, энергетикин, көлгн-күчнә болн залһлдана әңгин ахлачин дарукд батлгдв. Депутатын зөвән геесн Гаджи Ферояна ормд эн әңгиг Пүрбән Олег һардв. Депутат Елена Лотник ода хазна, алвна болн экономическ политикин әңгин гешүнд батлгдв.
Артем Михайлов сүүрин аш дигләд, сессин көдлмш дигтә-даратаһар давв гиҗ темдглв. Дарани сүүр бар сард болхмн гиҗ зуралгдҗана.
ДООҖАН Наталья



















Республиканская газета, издающаяся на калмыцком и русском языках. Газета освещает общественно-политические события, происходящие в Калмыкии, а также публикует материалы по культуре и языку калмыков.