Һурвн аң

Сегодня, 12:03 | Общество, Таңһчин зәңгс, Зіњг

Урд цагт арат, керә, чон һурвн нәәҗлдҗ, ах-дү болад бәәҗ. Тиигәд бәәҗәһәд, арат хот-хол хәәһәд гүүҗ йовад, хавхд торна. Дүнь, керә, эгчән торсинь медчкәд, нисч ирнә.
– Ай, эгч минь, чи берк юмнд орад одсн бәәнәч. Энүнәс мөлтрхин төлә үксн болад кевт. Эн хавхин эзн ик мергн аңһуч. Хавхас сулдхла, докъя өгнәв, чи зулад гү, – гиҗ келнә.
Тиигҗ бәәтлнь, хавхин эзн саадг, суман ардан үүрсн ирнә. Үксн аратыг үзәд, байрлҗ, инәмсклҗ мөрнәсн бууна. Аратыг хавхас һарһад, һанзан авад, түңгрцгәсн тәмк нерәд, кетән авад, һал цәкхәр седҗәхләнь, деегүрнь нег керә нисч йовад, «доң-доң» гиҗ хәәкрнә.
Тер ду соңсад үксн арат шурд босад, үкс гиҗ гүүһәд, урһа моднур орад, уга болҗ одна. Аңһуч һанзан хайчкад, саадган авад, аратын ардас хаһад авна. Сумн аратд биш, түүнә дүүд, чонд тусад, нүдәрнь орад, чикәрнь һарна. Чон һаңняд, доран һәрәдәд, унад үкҗ одна.
Чон аратыг хавхд торхла: «Әмтәхн махн һарчана. Эгч хавхд торсн бәәнә, әмнь һарх бәәдлтә», – гиҗ санад, шагшг модн дотр кевтсн бәәҗ.
Эн һурвн аңгин йовдл деерәс иим учр-утхта үгмүд һарсн болдг: «Килнцнь нүднд, хәрүнь чикнд».

Видео