Өрүни герл

Сегодня, 12:01 | Общество, Таңһчин зәңгс, Зіњг

Теңгрт улан нарн өөдмин цааһас һарч ирәд, эврәннь алтн герлән делгү цацв – һазриг серүлв.
Түрүн герл һазрур нисәд, торһад тусв. Торһа шовун серәд, үүрәсн нисч һарад, теңгрүр өөдләд, эврәннь цеңнсн цаһан мөңгн дууһан дуулв: «Өрүни цевр аһарт ямаран сәәхн! Йир сәәхн! Ямаран у!»
Хойрдгч герл туулад тусв. Туула чикән сольвчкад, байртаһар һәрәдәд, чиг унсн теегүр темцв: өрүни хотан – шимтә, көк ноһа олҗ авхар тер гүүв.
Һурвдгч герл такан герт тусв. Эр така җиврән саҗад, «ку-ка-ре-ку» гиҗ дуулв. Күүкн-такас суусн бәәрнәсн бослдад, хәәкрлдәд, шег-бог көләрн тееһәд, хорхас хәәцхәв.
Дөрвдгч герл зөгин герт тусв. Зөг эврәннь хорһн гертәсн һарчкад, терз деер сууһад, җиврән деләд, «зум-зум-зум!» гиҗ дуулв. Сәәхн үнртә цецгүдәс бал цуглулхар нисәд һарцхав.
Тавдгч герл бичкдүдин хорад тусв, залху бичкн көвүнә кевтсн бәәриг герлткв: терүнә чирәд тусч генүлв, тер көлврәд, талдан хәврһдән кевтәд, дәкнәс унтҗ одв.
Константин УШИНСКИЙ

Видео