Тутрһ хураҗана

Сегодня, 13:21 | Общество, Таңһчин зәңгс, Зіњг, Селәнә эдл-аху

Октябрьск районд тутрһ хуралһна кем давҗана. Тодлхас, нидн Әрәсән селәнә эдл-ахун Министерствлә бооца батлсна ашт тутрһин тәрәнә һазрин аһу икдв. Тер мет шаңһа дем күргснә йовудт услврин усна үннь даңцагддг болв. Эн керг-үүлдвриг таңһчин Толһач Хаска Батун онц кевәр бүрткнә.

Шидр кесн то-дигәр, ода деерән 420 гектар аһу һазрас тутрһ хурагдсн болв. Ут тоодан болхла 1618 гектар аһу һазрт тутрһ тәргдсн билә. Тер тоод «50 лет Октября» эдл-аху 1553 гектар, «Исток» бүрдәц болхла 65 гектар аһу һазрт тутрһ тәрсн болдг.
Нег гектар тәрәнәс 40,4 центнер тутрһ хурагдҗана. Дааврта кем һаха сард экләд, хулһн сарин чилгч күртл тутрһин урҗц хурагдх зөвтә.
Хальмг Таңһчин Октябрьск районд урһадг сән чинртә тутрһиг нег һазра улс бәәтхә талдан регионмудын әмтн чигн икәр хулдҗ авна, гиҗ темдглхмн. Тәрәнә һазрин аһу икдүлснә ашт нег һазра фермермүдин олз-орунь өсх зөвтә.
Тутрһ урһахд зөвәр амр биш гиҗ келх кергтә. Манад «Боярин», «Рапан», «Фаворит» болн талдан сән чинртә тутрһ урһагдна.
Тутрһ хуралһна көдлмшт эн җил арвн нәәмн комбайн, арвн һар трактор, аца зөөдг кесг машин болн талдан шишлң техник олзлгдҗана. Бәәрн тутрһчнр эн җил чигн элвг урһц хураҗ авхар зуралҗана.
Терүнәс нань Октябрьск районд 2224,5 тонн намрин ичмә болн 2522,7 тонн цаһан буудя хураҗ авгдв.
Мана таңһчд ар үзгт мелиорацин болн агротехнологийин ирлцңгү керг-үүлдврмүд давулад, эн көдлмш күцәҗ болҗана. Җил ирвәс тутрһин тәрәнә һазрин кемҗәг цааранднь улм икдүлхәр зуралгдҗана, гиҗ таңһчин селәнә эдл-ахун министерствд зәңглв.
КАРСАНА Евгения

Видео