Хог-бог зөөҗ һарһлһна төрәр

Сегодня, 15:28 | Общество, Таңһчин зәңгс, Зіњг

Шидр Хальмг Таңһчин Улсин Хуралын (Парламентин) промышленностин, тосхлтын, жилищн-коммунальн эдл-ахун, энергетикин, көлгнә болн залһлдана комитетин өргн сүүр болв. Хог-бог зөөлһнә болн терүг эд-бод келһнә төр терүнд хәләгдв. Таңһчин Улсин Хуралын Ахлач Артем Михайлов, депутатнр, таңһчин күцәгч йосна бүрдәцсин, прокуратурин, Элст балһсна һардврин элчнр, райодын муниципальн бүрдәцсин толһачнр чинртә төрәр болсн өргн күүндврт орлцад, ухан-тоолврарн хувалцв. Сүүриг комитетин ахлач депутат Пүрбән Олег һардҗ давулв.
- Эндр бидн чинртә төрәр комитетин өргн сүүр давулҗанавидн. Хог-бог зөөлһнә болн терүг эд-бод келһнә төр сүл цагт нәрн болҗана, тегәд хамдан эн төр хаһлҗ, бәәдлиг ясрулх эв-арһсин туст шиидвр батлх зөвтәвидн. Мана суңһачнрла болдг харһлтст әмтн ирлцңгү төр эрк биш босхна. Нег үлү хотл балһсна әмтиг эн төр үүмүлҗәнә, эдн хог-бог зөөдг бүрдәцин көдлмшиг ясрулхиг некнә. Зуг хамдан арһ-чидлән хамцулад нәрн төр хаһлҗ чадхвидн, - гиҗ Артем Михайлов сүүрин эклцәр келв.
Таңһчин ЖКХ-н болн энергетикин министрин дарук Шарманҗин Давид хог-бог зөөдг бүрдәцин үүлдврин тускар зәңгләд, ода мана таңһчд «СпецАТХ» эн керг күцәҗәнә гив. Эн бүрдәц таңһчин хотл балһснд болн цуг райодт хог-бог хураҗ, терүг хадһлдг бәәрнд авч ирҗ, эд-бод кенә. Эндр эн бүрдәцд 216 күн көдлҗәнә. Харм төрхд, эндр җолачнр болн хог-бог хурадг көдләчнр, шишлң көлгн чигн бас кергтә. Дәкәд әмтн цаглань туслмҗин мөңгиг эс өгдгнь бас нәрн төр болҗана. Сүл то-дигәр, әмтнә өрн 247 сай арслң тогтав, дәкәд олн зүсн бүрдәцс 77 сай арслң өртә бәәнә. Эн зунар тосн-түлән үнтәрснә ашт бүрдәцин үүлдвр һарута болв. Тер бийнь бүрдәц таңһчин залврин шиидврәр йилһгдсн мөңгәр шин көлг хулдҗ авх, балһсна уульцнст хог-бог цуглулдг талвңгудт сән таал тогтах арһ хәәнә. Орн-нутгин зәрм регионмудт бәәрн хазнас иим бүрдәцст дем күргнә, тегәд мана таңһчд бас тиим шиидвр батлгдхла, «СпецАТХ»-н көдлмш ясрхмн гиҗ дааврта һардач келв.
Таңһчин Улсин Хуралын Ахлачин дарук Нуура Николай, депутатнр Эрнҗәнә Петр, Хаалһин Очр, Манҗикә Наталья, Хар Һазра района толһач Болдра Валерий болн Приютна района толһач Манҗикә Басң хәләгдсн төрәр сурвр өгч, күүндврт орлцв. Приютна района толһачин келсәр, эдн шишлң көлг хулдҗ авад, бийснь хог-бог зөөдг билә, селәдт шишлң талвңгуд кев, болв «СпецАТХ» эднд өрән эс даңцаҗахас иштә үкр сарин эклцәс авн эдн шишлң уурв. Тосн-түлә хулддг арһлачд эдн 4 сай арслң өртә, тегәд шишлң көлгиг 10 сай арслңгар хулдад өрән даңцахар шиидв. Зуг эднд өринь даңцасн болхла көдләчнр урдк кевәрн көдлҗ чадх, шишлң көлг хулдх керг уга болх бәәсмн. «Бидн көдлхдән белн бәәнәвидн. Әмтиг көдлмш уга үлдәҗ болшго», - гиҗ района толһач зовлңгарн хувалцв. Хар Һазра района Ачнр болн Сарул селәдт хог-бог зөөдг көлгн күрхш гиҗ Болдра Валерий бас хувалцв. Ачнр селән күртл сән хаалһ уга болҗахас иштә көлгн тиигәрән йовхш. Ода «СпецАТХ» районд 7 сай арслң өртә бәәнә.
Элст балһсна толһачин негдгч дарук Кальдинә Борис, «СпецАТХ»-н бүрдәцин һардачин дарук Шеркеша Андрей тогтсн бәәдлиг ясруллһна туст күцәгдҗәдг керг-үүлдврмүдин тускар келв. Таңһчин залвр эн бүрдәцд дөң-нөкд болҗ, дем күргдгиг эдн темдглв. Тиигәд, эн җил йилһгдх 35 сай арслңгар райодын муниципальн бүрдәцсин өрн даңцагдхмн.
Ода цуг райодас болн хотл балһснас хог-бог зөөҗ хадһлдг шишлң бәәрн бәәнә. Эн олн җилмүдин эргцд олзлгдҗана, тегәд шин орм тосхх кергтә. Целинн района Вознесеновка селәнә өөр терүг 2029 җилд тосххар зуралҗана. Тосхлтын көдлмш ирх җилд эклхмн.
Сүүрт хәләгдсн төрәр депутатнр таңһчин күцәгч йосна бүрдәцст сүв-селвг орулх болв. Таңһчин Улсин Хуралын Ахлачин келсәр, өөрхн иргчдән хог-бог цуглуллһна, эд-бод келһнә болн хадһллһна төр дигтә-даратаһар хаһлгдх болв.

ДООҖАН Наталья

Видео