Хальмгин театр өөдән цол зүүв

Сегодня, 15:31 | Общество, Таңһчин зәңгс, Хальмг Тањєчин Толєачин ґдр-бўр, Зіњг

Хальмг Таңһчин Басңга Баатрин нертә Келн-улсин драмин театр 90 җилин өөнән темдглв. Таңһчин сойлын җирһлд һол орман эзлҗәдг театрт «академическ» гидг күндтә цол зүүлһгдв. Хальмгин театриг йөрәхәр Әрәсән кесг регионас болн һазадын ордудас театрин үүлдәчнр ирв.

Келн-улсин театрин коллективиг ончта өөнләнь Хальмг Таңһчин Толһач Хаска Бату йөрәв. Таңһчин оюни-сойлын җирһлин ул-сүүрнь болҗадг театрин чинр темдгләд, Бату Сергеевич кесг зун җилә бурхн-шаҗна гүн ном, өвкнрин авъясмуд Әрәсән тууҗд итклтә болҗ, үүдәгч үүлдврин урмд болҗахинь заав. «Келн-улсин драмин театрин тууҗ хальмг улсин тууҗла залһлдата. Бурхн - шаҗна гүн номин нилчәр тогтсн оюни-шагшавдын ул-сүүр Әрәсән улсин тууҗла болн хөв-кишглә эвтә кевәр ниилҗ, театрин үүдәгч үүлдврт йовуд өгчәнә», гиҗ таңһчин Толһач тоолврарн хувалцв.
90 җил хооран үкр сарин 8-д хальмг теегт театр экләд үүлдсн болдг. Теегин әмтнд эннь йир соньн йовдл болҗ тодлгдсмн. Тууҗин йовдлмудыг, өдр болһни җирһлиг тәәз деер үзүлнә гисн түрүн авгтан йир өврмҗтә бәәснь медгдҗәнә. Әәдрхнд билг-эрдмин сурһуль сурсн баһчуд Элстд ирәд, эврә театр секхәр шунснас авн Хальмг театр олн-әмтнлә хамдан кесн амр биш үүдәгч хаалһиг артистнр эн өдр үзүлв. Дән, тууврин җилмүд, Хальмгин автономиг шинәс тогталһн – җирһлин эн девсңгүд театрин үүлдврт чигн орман олсмн. Басңга Баатр, Лиҗин Улан, Калян Санҗ, Эрнҗәнә Нарма болн нань чигн седвәртә болн уралан зүткдг үүлдәчнрин нилчәр үүдсн Хальмгин театр орчлңд онц орман эзлҗәнә.
Театрин коллективиг йөрәсн улс терүгинь темдглҗ келв. Келн-улсин театр Әрәсән сойлд Әрәсән сойлд ач-тусан күргҗәхинь театрин үүлдәчнрин Ниицәнә ахлач Владимир Машков видеойөрәлдән темдглв.
Хальмгин залврин Ахлач Босхмҗин Гилән театрин коллективиг йөрәхләрн тууҗин хамгин күнд цагт келн-улсин сойлыг хадһллһн ямаран чинртә бәәсинь онц темдглҗ заав. «Сиврин тууврин цагт келн-улсин сойлан хадһлна гисн амр биш төр бәәсмн. Артистнрин кесгнь дәәнә җилмүдт Төрскән харсч дәәлдҗ йовсмн. Орн-нутгин җирһлд учрсн күнд тоотыг хальмг улс цуг әмтнлә хамдан дааҗ һарсмн. Цааҗла харһсн бийнь хальмгуд өвәрц сойлан хадһлҗ чадснь хамгин һоллгчнь болҗана. Мана ах үйин нилчәр бидн эндр Хальмг театрин 90 җилин өөниг темдглҗәнәвидн», - гиҗ Гиляна Герасимовна йөрәлин үгдән келв. Байрин сүүрин йовудт таңһчин залврин Ахлач Босхмҗин Гилән, таңһчин сойлын болн зуульчллһна министр Бембин Евгений, Хальмг Таңһчин Улсин Хуралын (Парламентин) депутат Хаалһин Очр театрин артистнрт болн көдләчнрт ачлврмуд бәрүлҗ өгв.
Олн һазрас ирсн театрин үүлдәчнр хальмг театрин коллективиг ончта өөнләнь йөрәһәд, белгүдән бәрүлҗ өгв. Дууна болн бииһин «Бамб цецг» ансамбль театрин коллективиг йөрәв, Дагестан Республикин улсин артист Мухтар Нухов хальмг келәр «Насндан» гидг Манҗин Аркадин ду дуулад байрта шууга татв. Азербайджана болн Хальмг Таңһчин ачта артист Ильхам Асадов тәвсн йөрәл болн Чувашас ирсн гиичнрин иньгллтин туск дун цуглрсн улст таасгдҗ, хоорндан ниитәһәр бәәснәс үнтә юмн һазр деер угаг медүлв.
Басңга Баатрин нертә Келн-улсин академическ драмин театр цугәрәсән тәәз деер хальмг улсин билг-эрдмиг өөдән кемҗәнд үзүлх төр өмнән тәвсн бәәнә.
ХӨӨЧИН Галина

Видео