Сойлын төрмүд хаһлгдв

Сегодня, 12:47 | Общество, Таңһчин зәңгс, Зіњг

Урҗ өдр Санкт-Петербург балһснд сойлын XII нарт-делкән ик хург эклв. Хальмг Таңһчин сойлын болн зуульчллһна министр Бембин Евгений болн театрин үүлдәчнрин хүүвин әңгин ахлач Владимир Стаценко терүнд орлцҗана.
Чинртә цуглранд 70 орн-нутгин элчнрин орлцһтаһар 26 талвңд олн керг-үүлдврмүд болв.
«Сойл кезә чигн олн-әмтиг хамцулна. Келн-улс хоорндан ниитәһәр бәәхин төлә нег-негнәннь тууҗ-сойлынь, авг-бәрцинь күндлҗ медх зөвтә. Ямр чигн амр биш цагт нег-негән күндлҗ дөңнәд бәәх кергтә», гиҗ Әрәсән Президент Владимир Путинә йөрәлин үгд келгдв.
Һурвн өдрин туршарт Санкт-Петербург балһсн сойлын нарт-делкән ик талвң болв. Музеймүдин, дегтрин саңгудын, кинематографин, нарт-делкән чинртә бумбсин, театрин болн ирлцңгү олн төрмүд тенд босхгдв.
Ик хургин шинҗләчнрин дунд нер һарсн Артемий Лебедев, Игорь Бутман, Михаил Швыдкой болн талдан сойлын үүлдәчнр олн зүсн харһлтст орлцад, дамшлтарн хувалцсн болдг. Эндр чинртә хург көдлмшән төгсәҗәнә.
БАДМИН Занда

Видео