Хальмгин ветеринарн цергллтд байрта йовдл болв. Эн цергллтин көдләчнр хамдан көдлҗәдг үүрән үнн седкләсн йөрәв. Марһанд диилвр бәрсн Сергей Новаковскийин өрк-бүлд эн седклин йөрәлән нерәдв. Эн олн үртә өрк-бүл «Олн үртә өрк-бүл – орн-нутгин улнь» гидг зургудын марһанд орлцад, нүүрт һарсмн.

Целинн района Троицкое селәнд «Физическ сойл болн спортын делгрлт» нертә шаңһа көтлвр күцәлһнә йовудт спортын өдгә цагин төв тосхгдҗана. Энүнд федеральн, таңһчин болн муниципальн хазнас мөңгн йилһгдв.

Одахн Элст балһсна 17-ч тойгта дунд сурһульд Хальмг Таңһчин ГАИ-н ах инспектор, полицин полковник Галимджан Нурнахамбетов эк-эцкнрин хургт орлцв.

[b]Хулһн сарин 2-т Әрәсәд болн мана таңһчд СПО-н бүрдәцсин өдр темдглнә. Колледжмүд көдлмшч эрдмтә баһчудыг кесг салврин төлә белднә. Сурһулян төгсәһәд эдн эмнлһнә, тосхлтын, сурһуль-эрдмин, селәнә эдл-ахун болн талдан халхар көдлнә. Болв тер һоллгч кергән сәәнәр күцәсн деерән мана таңһчин СПО-н бүрдәцс «Билет в будущее» гидг Цугәрәсән төсвд орлцна. Тиигҗ эдн 6-11 классин сурһульчнрт колледжд дасдг кесг эрдмин тускар тодрхаһар келҗ өгнә.
Төсвд орлцачнр тааста эрдмин тускар кесг тоот медҗ авсн деерән, теднә нуувчин тускар чигн цәәлһвр авна. Иигәд «Билет в будущее» төсвин кемҗәнд Ик Буурла района Орһахн селәнә болн Элстин 20-ч тойгта дунд сурһульмудын 6-11 классмудын арвтнр Хахлына Тамаран нертә медицинск колледжд одв. Клиникин кичәлин багш Окнян Ирина эднд эмнлһнд олзлдг кесг эв-арһ үзүлв. Терүнә хөөн сурһульчнр эврән чадмган сөрв, тер тоод цусна дарлт яһҗ кемҗлдгинь медҗ авв.

Хальмгт йиртмҗин әрүн бумб болҗ уласн модн тоолгдна. Теегт цагтан дүңгәҗәсн эн модыг зун җил хооран гелң Пурдаш суулһсн болдг. Төвдин һазрас авч иргдсн әрүн идәнәс теегт уласн модн өсч батрад, цуг әмтн энд ирҗ зальврдг орм болсмн. Ут цагин йовудт мана әрүн модн наснь икдәд, көгшрәд ирв. Терүг батллһнд ода цуг күчн-чидл залгдҗана.

Һаха сарин 25-д Төрскән харсгч Алдр дәәнә ветеран, Хальмг Таңһчин күндтә иргн Петр Леонтьев 101 насан зүүв. Хальмг Таңһчин Толһач Хаска Бату, Улсин Хуралын (Парламентин) ахлач Артем Михайлов, залврин гешүд, зөв-йос харлһна бүрдәцсин һардачнр, олна болн баһчудын бүрдәцсин элчнр һарсн өдрләнь энүг йөрәв. Немхд, күндтә көгшә дәәнә цагин көлгәр керг-үүлдврт ирв.

Шидр Хальмг Таңһчин Баһ Дөрвдә района толһач Җекин Баатр болн Бурятин Иволгинск района толһач Николай Емонаков нөкцлтин бооца батлв. Эннь муниципальн хоорндк халхар дәкәд нег чинртә йовдл болснь темдглх кергтә.

Одахн Хальмг ик сурһульд Әрәсән ик сурһулин болн номин Министерствин номтнрин делегац ирв. Давсн җилд министерствин демәр селекцин болн тохма мал өсклһнә төв таңһчин ик сурһулин медлд экләд көдлсмн, тер төсв ода яһҗ күцәгдҗәхинь НТП-н шинҗлхәр шаңһа бүрдәцин һардачин дарук Татьяна Модянова болн әңгин толһач Юлия Андронова Элстд ирсмн.

Хальмг ик сурһулин номтнр болн багшнр һазадын нутгудын кесг сурһульмудла бат залһлда бәрҗ кесг җилин туршарт теднлә нөкцлтән өргҗүләд йовна. Одахн Москвад Хальмг ик сурһулин һардач Салан Бадм Әрәсәд бәәдг Корей Республикин элчллтин министр зерг Ли Ен Зинлә харһв. «Күүндврин йовудт КНДР-ин вузмудла Хальмг ик сурһулин нөкцлтиг өргҗүллһнә, корей келнә багшнриг мана ик сурһульд көдлмшт оруллһна тускар үг һарв. Тер мет элчллтин дөңгәр корей келнә болн сойлын төв Хальмг ик сурһульд секлһнә тускар тоолврарн хувалцвидн. Мана нөкцлтиг өргҗүлхин төлә КНДР-әс Хальмг ик сурһульд билгтә баһчудыг йовуллһна туск төр бас хаһлгдв», – гиҗ элчллтд кесн харһлтын тускар Салан Бадм келв.

Бурхн Багшин Алтн сүмд хөрн һар җилин туршарт авъяс болсн шаҗна йосрхл күцәгдҗәнә. Шар шаҗнд шүтдг әмтн тантрическ йосрхлд җил болһн орлцна. Тогтсн авъясар, Хальмгин төв хурлын гелңгүд «Торгьяк» гидг шаҗна йосрхл күцәхмн. Эн йосрхл харш болҗадг цуг тоотыг уурулхмн.