Эрдмин нуувчиг медҗ авв

Сегодня, 12:05 | Общество, Таңһчин зәңгс, Зіњг

Хулһн сарин 2-т Әрәсәд болн мана таңһчд СПО-н бүрдәцсин өдр темдглнә. Колледжмүд көдлмшч эрдмтә баһчудыг кесг салврин төлә белднә. Сурһулян төгсәһәд эдн эмнлһнә, тосхлтын, сурһуль-эрдмин, селәнә эдл-ахун болн талдан халхар көдлнә. Болв тер һоллгч кергән сәәнәр күцәсн деерән мана таңһчин СПО-н бүрдәцс «Билет в будущее» гидг Цугәрәсән төсвд орлцна. Тиигҗ эдн 6-11 классин сурһульчнрт колледжд дасдг кесг эрдмин тускар тодрхаһар келҗ өгнә.
Төсвд орлцачнр тааста эрдмин тускар кесг тоот медҗ авсн деерән, теднә нуувчин тускар чигн цәәлһвр авна. Иигәд «Билет в будущее» төсвин кемҗәнд Ик Буурла района Орһахн селәнә болн Элстин 20-ч тойгта дунд сурһульмудын 6-11 классмудын арвтнр Хахлына Тамаран нертә медицинск колледжд одв. Клиникин кичәлин багш Окнян Ирина эднд эмнлһнд олзлдг кесг эв-арһ үзүлв. Терүнә хөөн сурһульчнр эврән чадмган сөрв, тер тоод цусна дарлт яһҗ кемҗлдгинь медҗ авв.
Эдн терапийин болн гинекологин кабинетмүд-мастерскойд одв, фельдшерин даальнгинь секәд, тенд юн бәәхинь, юуна төлә олзлдгинь медҗ авв.
- Арвтнр кесг сурвр өгнә. Зәрмснь химийин болн биологийин салврта класст сурна, колледжд орлһна зокалын тускар бас тодрхаһар сурв. 9-ч классан төгсәснә хөөн эднәс зәрмснь мана тал ирҗ сурна. Тер тоот мадниг бас байрлулна, тиим кевәр бидн күүкдт тааста эрдм шүүҗ авлһнд дөң болнавидн,- гиҗ экскурсь кесн колледжин багш Ирина Юрьевна темдглв.
Сурһульмудын арвтнр теднә төлә кесн графикәр ирнә, тенд ямаран өдрлә, ямаран цагла эдн ирх гиҗ заагдна. Иигәд, даруһас Элстин 8-ч тойгта дунд сурһулин, Хальмг келн-улсин гимназин болн Элстин классическ гимназин күүкд ирҗ, колледжин багшнрас болн оютнрас цәәлһвр авх.
Җил болһн колледжд фельдшерин, лаборантын, эмнлһнә эгчин эрдм авхар Элстин болн райодын сурһульмудас 9-ч болн 11-ч классан төгсәсн арвтнр ирнә. Цуг әңгүдт баһ биш марһан болна, нег ормд 2-3 күн орхар дөрлднә. Эн җил 105 күн эмнлһнә эс гиҗ талдан янзта бүрдәцлә бооца батлсна хөөн оютнрин тоод орла. Тиим кевәр эдн колледж чиләснә хөөн эрк биш көдлмшән олҗ авх.
Хальмг медицинск колледж төгсәсн баһчуд Москван, Аһшин, Әәдрхнә эмнлһнә ик сурһульмудт болн Хальмг ик сурһульд орҗ цааранднь сурна. Кесгнь колледжин хөөн дарунь таңһчин эмнлһст ирҗ көдлнә.
Приютна олн салврта гимназин сурһульчнр болхла бас эн өдр билг-эрдмин колледжд ирв. «Билет в будущее» төсвин зүүцүләч Дандан Вероника эднд наадһасин «Җаңһр» Хальмг шаңһа театрар экскурсь кев. Энүнә тууҗин тускар чигн гиичнрт келҗ өгв, дәкәд күүкд кесг цехмүдин көдлмшлә таньлдв. Тер тоод хувц уйдг цехд, зурачнр-бутаформудын мастерскойд, наадна сөрлһ кедг залд сурһульчнр одв.
Цааранднь наадһас ямаран болдгинь театрин артистнр эднд келҗ өгв. Харһлтын чилгчәр уйн наста гиичнр эврән тәәз деер һарад, актерин үүдәлтд чидлән сөрҗ, наадһасла хамдан зурган цокв.
Тиигҗ «Билет в будущее» гидг Цугәрәсән ик кемҗәтә төсв тааста эрдм шүүҗ авхд дөң болна. 6-ч классин сурһульчнр энүнә тускар бас дөрвн-тавн җилдән ухалҗ чадҗана, ах классин арвтнрт тиим дала цаг уга, болв колледжмүд дасхдг эрдмлә тодрхаһар таньлдад, эдн эрк биш седклднь ирлцәтә эрдм шүүҗ авад бәәх гиҗ сангдна.
ТҮРВӘН Һуна

Видео