Җирһлд туслх мөргүлмүд

Сегодня, 12:35 | Общество, Таңһчин зәңгс, Зіњг, Бурхн-шаҗна төрәр

Бурхн Багшин Алтн сүмд хөрн һар җилин туршарт авъяс болсн шаҗна йосрхл күцәгдҗәнә. Шар шаҗнд шүтдг әмтн тантрическ йосрхлд җил болһн орлцна. Тогтсн авъясар, Хальмгин төв хурлын гелңгүд «Торгьяк» гидг шаҗна йосрхл күцәхмн. Эн йосрхл харш болҗадг цуг тоотыг уурулхмн.
Һаха сарин 30-д эннь кегдхмн. Шаҗна үүлдвр хойр девсңгәр болхмн: өрүн 9 часас авн 11:30 час күртл, үдин хөөн 13 часас авн 15 час күртл давулгдхмн.
Хулһн сарин 1-д «Джинсег» шаҗна йосрхл күцәгдхмн. Эн үүлдвр өрүн 9 часас авн 12 час күртл болхмн. Хулһн сарин 3-д болхла гелңгүд «Янгдруб» йосрхл күцәхмн. Керг күцәлһнд, эрүл-менд бәәлһнд болн бәәхтә җирһл тетклһнд туслх ик мөргүл болҗана. Шаҗна эн йосрхл бас өрүн 9 часас авн 11:30 час күртл, үдин хөөн 13 часас авн 15 час күртл кегдхмн.
Тантрическ эн йосрхлмудыг товчлҗадг «Танграк Кангсо» гидг йосрхлд орлцад, әмтн бурхн-шаҗна ном бәрҗ, олнд тархаҗ йовдг шаҗна хувргудт болн үүлдәчнрт ханлтан медүлхмн болҗана. Шаҗна эн үүлдвр хулһн сарин 4-д өрүн 9 часас авн 11:30 час күртл, үдин хөөн 13 часас авн 15 час күртл давхмн.
Мана таңһчд иим тантрическ йосрхлд орлцлһн йирин үүлдвр болдгасн чинрнь икдҗ, шаҗна номиг үнндән медҗ, оюни түшг кеҗ үүлдх туслхнь лавта. Шаҗна йосрхлд орлцулх байн-кишгин саван хурлд авч ирәд, һаха сарин 30-ас авн хулһн сарин 1-2-т 9 часас авн 17 час күртл 317-ч тойгта хорад орулҗ өгх кергтә. Хулһн сарин 4-6-д 10 часас авн 17 час күртл хәрү кишгин саван авч болхмн.

УШКАНА Сувсн

Видео