Уйн хар модн

Сегодня, 11:38 | Общество, Таңһчин зәңгс, Зіњг

Хальмгт йиртмҗин әрүн бумб болҗ уласн модн тоолгдна. Теегт цагтан дүңгәҗәсн эн модыг зун җил хооран гелң Пурдаш суулһсн болдг. Төвдин һазрас авч иргдсн әрүн идәнәс теегт уласн модн өсч батрад, цуг әмтн энд ирҗ зальврдг орм болсмн. Ут цагин йовудт мана әрүн модн наснь икдәд, көгшрәд ирв. Терүг батллһнд ода цуг күчн-чидл залгдҗана.

Уласн модн урһҗадг һазрт шидр хар модн суулһгдсн билә. Уйн модн яһҗ эн бәәрнд уңган батлҗахинь бүрткхәр нааран ирҗ килмҗән һарһна. Һаха сарин 22-т нааран мергҗлтнр ирв. Воронеж балһснас ирсн мергҗлт Иван Гордиенкон һардврт эдн хар мод шинҗлҗ хәләв. И.Гордиенко микробиолог болсн деерән эврә балһсндан питомник толһална.
Баахн хар мод услхларн терүнд шишлң теңгрин ки дахулҗ суулһв. Эн теңгрин кииг мод суулһдг әдл мана бәәдллә иҗл һазрт урһасмн. Терүг Воронежас авч ирсмн. Эн теңгрин ки хар модна уңгла хамдан ниилҗ батрад, модна деерк көрснь һазрас усиг болн нань чигн кергтә тоотыг кергтә кемҗәнд бийдән шиңгәҗ авхд туслхмн. Хальмг теегин хагсу бәәдлд урһҗадг хар моднд тиим дөң туста болхнь маһд уга гиҗ номт тоолҗана.
Мод шинҗлҗ хәләһәд, тер сәәнәр урһҗахинь, зунын халуг дааҗ һарсинь, эн һазрин бәәдлд иҗлдҗәхинь Иван Гордиенко темдглв. Эн мергҗлтин тоолврар, мод суулһсна хөөн түрүн һурвн җил терүг оньган өгч хәләх кергтә. Сәәнәр батрхднь түрүн һурвн җилд килмҗ кергтә.
Хальмг Таңһчин онц хәләврт бәәдг һазрин дирекц эн модна туст килмҗ һарһҗ хәләҗәнә. Даруһас эн бүрдәцин мергҗлтнр модыг үвлин бәәдлд өслһнднь туслх белдвр кехәр бәәнә.
ҖИРҺЛИН Кермн

Видео