Петр Леонтьевиг йөрәв

Сегодня, 13:23 | Общество, Таңһчин зәңгс, Зіњг

Һаха сарин 25-д Төрскән харсгч Алдр дәәнә ветеран, Хальмг Таңһчин күндтә иргн Петр Леонтьев 101 насан зүүв. Хальмг Таңһчин Толһач Хаска Бату, Улсин Хуралын (Парламентин) ахлач Артем Михайлов, залврин гешүд, зөв-йос харлһна бүрдәцсин һардачнр, олна болн баһчудын бүрдәцсин элчнр һарсн өдрләнь энүг йөрәв. Немхд, күндтә көгшә дәәнә цагин көлгәр керг-үүлдврт ирв.
Тодлхас, Петр Леонтьев 1958 җилд Хальмгт ирәд, энд иҗлдәд, эндр күртл олна хормад багтҗ бәәнә, Б.Б.Городовиковин дуудврин салдс эн болна. Олн җилмүдин туршарт эн тосхлтын халхар көдләд, мана таңһчиг шинәс босхлһнд ик ач-тусан күргв.
Йөрәлин керг-үүлдврт Петр Леонтьевичин нег һазра улс, Чувашин Республикин делегац ирҗ орлцснь темдгтә болв. Тер һазра залврин ахлач Сергей Артамоновин нерн деерәс Ханлтын бичг болн чуваш келн-улсин ке-сәәхн хувц тедн авч ирв. Күндтә ветеран белгән өмсәд, зоксн хувцтаһан бииләд чигн одв.
Хальмгин Толһач Хаска Бату Әрәсән Президент Владимир Путинә көгшәд илгәсн йөрәлин бичг умшҗ соңсулв. Терүнд Алдр Диилвр делдснь болн дәәнә хөөн орн-нутгиг шинәс босхснь онц темдглгдв. Энүнә кесн кергнь дорас өсч йовдг баһчудт эрк биш үлгүр болна, гиҗ бичгт келгдв.
– Бидн цугтан Петр Леонтьевиг күндлнәвидн, тевчнәвидн. Мадна төлә ветеран Алдр Диилврин темдг болн үлгүр-үзмҗ болна. Зун негн наста болв чигн эндр күртл эн олна бәәдл-җирһлд шунмһаһар орлцад йовна. Петр Леонтьевичд нег һазра улсин нерн деерәс дәкнәс ик ханлтан өргҗәнәв. Цааранднь олнд үлгүр болад бәәтн, – гиҗ Бату Сергеевич йөрәв.
«Өөрднр» бииһин театрин һардач, Хальмг Таңһчин Баатр Нәдвдә Петр көгшәг һарсн өдрләнь бас йөрәв. Тер мет нег һазра нертә сойлын коллективс болн артистнр олна йөрәлин үгд багтад, билг-эрдмән нерәдв.

КАРСАНА Евгения

Видео