Сурһуль-эрдмин халхар нөкцлт делгрхмн

Сегодня, 12:57 | Общество, Таңһчин зәңгс, Зіњг

Хальмг ик сурһулин номтнр болн багшнр һазадын нутгудын кесг сурһульмудла бат залһлда бәрҗ кесг җилин туршарт теднлә нөкцлтән өргҗүләд йовна. Одахн Москвад Хальмг ик сурһулин һардач Салан Бадм Әрәсәд бәәдг Корей Республикин элчллтин министр зерг Ли Ен Зинлә харһв. «Күүндврин йовудт КНДР-ин вузмудла Хальмг ик сурһулин нөкцлтиг өргҗүллһнә, корей келнә багшнриг мана ик сурһульд көдлмшт оруллһна тускар үг һарв. Тер мет элчллтин дөңгәр корей келнә болн сойлын төв Хальмг ик сурһульд секлһнә тускар тоолврарн хувалцвидн. Мана нөкцлтиг өргҗүлхин төлә КНДР-әс Хальмг ик сурһульд билгтә баһчудыг йовуллһна туск төр бас хаһлгдв», – гиҗ элчллтд кесн харһлтын тускар Салан Бадм келв.
КНДР-ин вузмудын болн Хальмг ик сурһулин хоорндк нөкцлтиг өргҗүллһнә халхар орн-нутгин элчллт дөңгән күргх седклән медүлв.
Хальмг ик сурһульд оютнр кесг кел дасна, тер тоод корей келнә әңг бәәнә. Энүнә оютнр корей улсин бәәдл-җирһллә, соньн сойл-авъясла таньлдхар седҗәнә. Элчллтд болсн харһлт эн туст нилчән күргхнь лавта.
Тер мет Хальмг ик сурһулин делегац Әәдрхнд бәәдг Ирана, Казахстана болн Туркменистана элчллтст одв, эн орн-нутгудын элчнрлә харһв. Эднә вузмуд кесг җилин туршарт Көк теңгсин көвән ик сурһульмудын негдлтин ханьд үүлдҗәнә. Тер нөкцлтиг өргҗүллһнд Хальмг ик сурһуль туслҗана гих кергтә.
Тегәд чигн Хальмг ик сурһульд нарт-делкән шинҗләчнрин селвлцән хулһн сарин 25-ас авн 29 күртл болхмн. Ирана хотл Тегеран балһснд болсн Көк теңгсин экономикин ик хургт тиим селвлцә бүрдәлһнә туск шиидвр батлгдсмн.
Энүнәс нань Москвад Азербайджана элчллтд Хальмг ик сурһулин һардвр бас харһлт бүрдәв. Энд бас Көк теңгсин көвән вузмудын селвлцәнә тускар күүндвр болв. Тер мет Азербайджана ик сурһульмудла нөкцлтиг өргҗүллһнә, хамцу төсвс күцәлһнә тускар үг һарв. Экологин төрмүдт энд бас ик оньг өггдв.
Тиигҗ Хальмг ик сурһуль һазадын нутгудын вузмудла залһлдаһан өргҗүләд йовна. Тиим өргн хәрлцән нөкцлтин, сурһулин, номин делгрлтин кесг төрмүд күцәхд туслхнь маһд уга.
ҖААХАН Бадм

Видео