«Улан Залата» - байрин нәр

Сегодня, 12:22 | Общество, Таңһчин зәңгс, Зіњг, Сойл

«Улан Залата» гидг нертә байрин ик нәр Элстд болв. Келн-улсин дегтрин саңд эн байрин үүлдвр күцәгдв. Таңһчин әмтн болн олн гиичнр эн керг-үүлдврт орлцв. Хальмг улсин тууҗар, сойлар, авъясмудар соньмсчадг әмтнд эннь йир соньн болв. Үүдәгч үүлдврән делгрүлхин төлә, энд кесг талвң үүлдсн билә.
Байрин нәр секлһнд «Теңгрин би» гидг бииһин ансамблин, Элстин 2-ч тойгта көгҗмин сурһулин домбрчнрин, нань чигн билгтә баһчудын орлцлһтаһар эн давв. Шаран Алтн дуулснь цуглрсн улст таасгдв. «Эрдэни Цецг» гидг үүдәлтиг бүрдәсн шүлгч Эрднин-Җимбин Лилиян дуулсн дун әмтнд өргмҗ үүдәв.
Әрәсән шаңһа дегтрин саңгин көдләчнр Алевтина Артемова болн Валерия Яшкова цуглрсн улсиг йөрәв, Хальмг Таңһчин сойлын болн зуульчллһна министерствин әңгин һардач Баира Лялина эн керг-үүлдврин чинрин тускар келәд, үүдәгч күцәмҗ дурдв.
Дегтрин саңгин хора кесг әңгәр хувагдҗ, күн болһн тааста нег керг-үүлдврт орлцдгар бүрдәгдв. Энд урн һарин эрдмчнрин һәәхүл-яарм әмтнә оньгт тусхагдв. Келн-улсин зег орулҗ кеерүлсн олн кегдлмүдиг гиичнр хулдҗ авв. Нааран ирсн әмтнә кесгнь урчнрин кичәлмүдт орлцҗ, бийснь һарар юм кедгиг дасв. Хуучн хальмг бичлтәр соньмссн әмтн тод бичгин кичәлд орад, багш болн келмрч Тербатан Очрин һардврт йөрәл бичдгиг дасв.
Урн һарин эрдмчнрин бүрдәцин һардач Адьяна Екатерина ишкә келһнә медрләр хувалцв. Өвкнрин сойлын авъясмудыг цааранднь делгрүлҗәдг үүдәгч баһчуд, тер тоод өдгә цагин некврлә ирлцҗәдг үүлдврин шин аһу үүдәсн арһлач Мунин Аркадь ухан-тоолврарн хувалцв. Өдгә цага балһсна бәәдлд кезәңк авъясмудыг яһҗ олзлҗ болхин, бизнес болн билг-эрдм хоорнд ямаран залһлдан бәәхин тускар тохнята күүндвр болв.
Шар шаҗна үүлдәчнрин нарт-делкән һурвдгч цуглранд нерәдҗ цокч авгдсн фильм әмтнә оньгт тусхагдв. Фильмин режиссер Утнасна Дорҗла болсн күүндврт әмтн кесг сурвр өгч, медрлән гүүдүдв.
ҖИРҺЛИН Кермн

Видео