Ясврин хөөн шинрүлгдсн сурһуль

Сегодня, 12:57 | Общество, Таңһчин зәңгс, Зіњг

Хальмг Таңһчин сурһульмудт болн бичкдүдин садмудт бат ясвр күцәгдҗәнә. Үстин района Эрднихнә дунд сурһулин көвүд-күүкд болн багшнр таньгдшгоһар хүврсн, шинрүлгдсн, йоста бәәшң болсн сурһулин гертән шин җилән эклв. Района һардач Очра Геннадий ясврин йовудыг бүрткв, сурһульчнрин эк-эцкнр болн багшнр бас нөкд болв.
Бидн мана района һардврт ик ханлтан өргҗәнәвидн, гиҗ селәнә сурһулин һардач Лиҗин Зоя темдглв. Сурһулин герин һазакнь бас Үстин РМО-н дөңгәр хүврүлгдв. 1978 җилд эдлврт орсн хойр давхр сурһулин герин терз-үүдинь соляд, ораһинь шинрүлв, хораст шин девскр тәвгдв, хот уудг герт, физикин, химийин хораст шин кергсл орулгдв.
«Ода иим сурһульд сәәнәр сурч, кесг керг-үүлдвр бүрдәҗ болҗана», – гиҗ Зоя Николаевна келнә. Эврән эн бас ясврин көдлмш бүрткҗ амрлһна цаган сурһулин герт давулв. Энүнә келсәр, тосхлтын цуг көдлмшиг таңһчин «Санрайзстрой» бүрдәцин мергҗлтнр күцәв, дөчн нәәмн җилин туршт эдлврәсн һарсн дулана болн усна сурвлҗиг эдн сольв.
Тосхлтын бүрдәцин һардач Чимдә Олегд болн көдлмшин ик зууһинь күцәсн энүнә дарук Баджан Бадмд сурһульчнр болн багшнр ханлтан өргҗәнә. Тосхачнр ясврин көдлмшиг мөрн сарин 1-д экләд зуни чилгчәр дуусв.
Эврә цагтан физикин багш, баһ наста мергҗлт Лиҗин Зоя Хальмг ик сурһулиг төгсәснә хөөн нааран ирәд, ах классмудын арвтнриг сурһсмн. Ода бас баһ наста мергҗлтнр эклц классин багшнр Чемдә Даяна болн Чемдә Алтнай, эн сурһульд ирҗ көдлҗәнә. Эсвин багш Кудана Нина, физикин багш Лиҗин Данзн болн талдан мергҗлтнр эднд селвгән өгч, дамшлтарн хувалцна.
Мана орн-нутгт эклц классин сурһульчнр өңгәр халун хотар теткгднә, терүг замчнр белднә. Талдан классин сурһульчнр чигн энд хот эдлнә.
Зуульчлхдан чигн бәәрн арвтнр дурта. Одахн 7-ч болн 9-ч классмудын сурһульчнр эврә классин һардачнрла хамдан Адыгейд күрәд, эн һазрт һәәхәд ирв.

ҖААХАН Бадм

Видео