Бурхндан зальврад

08-10-2026, 12:13 | Общество, Таңһчин зәңгс, Зіњг

Цергә шишлң керг-үүлдвр болҗадг һазрт белдвр кегддг нег бәәрнд түрүн хурл секгдв. «Төв» цергә багин дәәчнр терүг босхҗ авсмн. Дәәлдәнә һазрас невчк ууҗм һазрт дәәчнр эврә һарарн хурлан тосхв. Хурл дотр мөргүлин төлә цуг тоотнь бәәнә. Шаҗна үүлдврт кергтә тоотыг Тыван һардвр нааран илгәсмн.

Дәәч даалһвр күцәхәр һарч йовхларн цергчнр, ямаран чигн келн улс йилһл уга нааран ирҗ мөргҗ, зальврҗ һарна. Тиигәд седклән батлҗ авад, цергчнр әәмшгтә көдлмшән күцәхәр һарч йовна. Бурхн Багшин номд шүтдг улс мөргүлән кедг һанцхн иим хурл ода энд тосхгдсн бәәнә.
«Буйнта керг күцәсндән байрта бәәнәвидн, - гиҗ цергә-политикин төрәр батальона командирин дарук Александр Панькин келнә. - Дәәнәс һарч ирсн цергчнр нааран ирәд, бурхндан зальврад, гертксиннь тускар ухалад, цаг-зуур гертән ирснлә әдл сууҗ амрх бәәрн ода бәәнә.
Цергә даалһвр хоорнд завср һарсиг олзлад, көвүд хойр сардан хурлан босхҗ авв. Һазр малтгдҗ,шаврнь зөөгдҗ, тосхлтын ул-сүүр болх бәәрн белдгдлә. Дарунь ораһинь бәрх төмр углҗ тәвгдлә. Хурлын дотркнь 160 дөрвлҗн метр һазр эзлнә. Хурлын ора күртл һурвн метр өндр болҗана».
Энд церглҗәдг көвүд болн залус шаҗна зокал бәрҗ, чик седкләр бәәнә. Ни-негн Төрскнәннь төлә дәәлдҗәдг цергчнр бурхн цугтад негн гиҗ тоолҗ зальврна. «Бурхн күүнә седклд», - гиҗ тоолдг болв чигн цергчнр бурхна номта, мөргүл кегдсн бәәрнд ирҗ, седкл-ухаһарн төвкнх бәәрн бәәхдән ийр ханлтта бәәнә.
Бидн болхла, дән төгсч, мана көвүд әмд-менд гертән иртхә гиҗ зальврҗанавидн.
УШКАНА Сувсн

Видео