Фашизмин үүл мартгдшго

08-10-2026, 12:26 | Общество, Таңһчин зәңгс, Зіњг

Одахн Хальмг ик сурһульд номин-дамшлтын хург болв. Германьд дәәнә хөөн Нюрнбергин зарһ 80 җил хооран төгссн йовдлд эн керг-үүлдвр нерәдгдв. 1945 җилин хөн сарин 9-д Советин Союз Төрскән харсгч Алдр дәәнд диилвр бәрв. Болв тер аврлт уга дәәнд мана орн-нутг 27 сай иргнән геев, Европин орн-нутгудын геедрлтиг немхлә, 54 сай күн делкән хойрдгч дәәнд әмнәсн хаһцла. Кесг то балһсн болн селән бомбдлһнд тусад, шатагдад уга кегдлә, тенд бәәсн арвад сай әмтн, бичкдүд, медәтә болн күүкд улс дәәнә һалвд әмән геев.
Тер аврлт уга тоолҗ болшго үүлиг Германя фашистнр болн теднә әәрм татсмн. Тер геедрлтиг мартҗ болшго. Тегәд чигн фашистнрин үүл татлһиг цуг делкәд үзүлхин төлә Нюрнбергин зарһ болсмн. 1945 җилин үкр сарин 22-т экләд, 1946 җилин хулһн сарин 1-д төгссмн. Нюрнбергд фашизм экләд тогтагдла, тегәд тер балһснд зарһ кехәр чигн шиидсмн.
Дәәнәс көлтә учрсн олн аврлт уга йовдлын туск фильм үзүлгдв, терүнә йовудт оютнр наадан тәвв. Нюрнбергин зарһд фашистнрин һардачнр татсн үүлин тускар келҗ өгв, зарһчнр теднд сурвран өгәд бәәв.
Наадна хөөн Хальмг ик сурһулин багшнр илдклән кев, хургт тер мет Әрәсән Мөшклһнә комитетин академин һардач Алексей Бессонов орлцҗ үг келв. Эн керг-үүлдврт тер мет таңһчин Улсин Хуралын (Парламентин) Ахлач Артем Михайлов, таңһчин залврин Ахлачин дарук Өлзәтин Марина, федеральн ах инспектор Александр Беляев, таңһчин прокурор Виталий Семенченко болн йосна талдан элчнр орлцв.
- Ямаран чигн үүл татлһн зарһин шоодврла харһх зөвтә. Нег үлү арвад саяд әмтиг алсн фашистнр тиим зарһла Нюрнбергд харһв. Номин-дамшлтын хург бүрдәсн Хальмг ик сурһулин һардврт ханлтан өргҗәнәв. Энүнд оютнр, Элстин 4-ч тойгта сурһулин прокурорин классин сурһульчнр орлцснь темдгтә болв. Тиим кевәр баһчуд тууҗин, зөв-йосна тускар бат медрл авх, - гиҗ таңһчин прокурор Виталий Семенченко седкүлчнрт тоолвран келв.
ҖААХАН Бадм

Видео